Վրաստանի 11-րդ գումարման խորհրդարանի գարնանային նստաշրջանը կբացվի փետրվարի 3-ին։ Կանոնակարգի համաձայն՝ Վրաստանի խորհրդարանի գարնանային նստաշրջանը բացվում է փետրվարի առաջին երեքշաբթի օրը։

Ինչպես հայտարարել է խորհրդարանի նախագահ Շալվա Պապուաշվիլին բյուրոյի այսօրվա նիստի ժամանակ, խորհրդարանի գործունեության տարեկան հաշվետվությունը նա կներկայացնի օրենսդիր մարմնին մարտի առաջին շաբաթում։

Խորհրդարանի բյուրոն քննարկել է նոր օրենսդրական նախաձեռնություններ և որոշում է կայացրել դրանց հանձնաժողովային քննարկումների մեկնարկի վերաբերյալ։

«Վրացական երազանք» խմբակցության կողմից նախաձեռնված օրենսդրական փաթեթով նախատեսվում են փոփոխություններ «Շահերի մասին» օրենքում, «Քրեական օրենսգրքում», «Վարչական դատավարության օրենսգրքում», «Վարչական իրավախախտումների օրենսգրքում», «Քաղաքացիների քաղաքական միավորումների մասին» օրգանական օրենքում և «Պետական աուդիտի ծառայության մասին» օրենքում։

Բյուրոն որոշել է օրենսդրական փաթեթի համար պատասխանատու հանձնաժողով ճանաչել իրավական հարցերի հանձնաժողովը։

Վրաստանի կառավարության կողմից ներկայացված «Հանրային հիմնարկներում աշխատավարձերի մասին» օրենքում փոփոխության նախագծով նախատեսվում է, որ այն նորման, որը կարգավորում է հանրային ծառայությունում ստաժորների վարձատրման առավելագույն չափը, չի տարածվի Արտաքին գործերի նախարարության արտերկրում գտնվող կառուցվածքային ստորաբաժանումների ստաժորների վրա։ Բացի այդ, օրենքին կավելացվի դրույթ, ըստ որի արտերկրում աշխատող ստաժորը աշխատավարձ կստանա Արտաքին գործերի նախարարի իրավական ակտով սահմանված առավելագույն չափի սահմաններում։

Աջարիայի ինքնավար հանրապետության Գերագույն խորհրդի կողմից ներկայացված օրենսդրական նախագծով «Հանրային ծառայության մասին» օրենքում կատարվող փոփոխությամբ կփոխվի Աջարիայի նախարարության անվանումը։ Մասնավորապես, Աջարիայի կրթության, մշակույթի և սպորտի նախարարության փոխարեն կհստակեցվի՝ Աջարիայի կրթության և սպորտի նախարարություն։

Ինչպես հայտարարել է խորհրդարանի նախագահ Շալվա Պապուաշվիլին, խորհրդարանի լիագումար նիստերը կկայանան հաջորդ շաբաթ՝ փետրվարի 3-ին և 4-ին։