Վրաստանի խորհրդարանի շենքում ընդդիմության ներկայացուցիչները հանդես են եկել համատեղ հայտարարությամբ:

«Միացյալ ազգային շարժման» անդամ Խատիա Դեկանոիձեի խոսքով՝ խորհրդարանական մեծամասնությունը հավաքել է մեծամասնական պատգամավորների ստորագրությունները և որոշել չանցկացնել նախագահի կողմից այսօր հրավիրված խորհրդարանի նիստը՝ խախտելով Վրաստանի Սահմանադրությունը։

Խատիա Դեկանոիձեն ասում է, որ մեծամասնության այս որոշումը ամոթալի է։

«Վրաստանի քաղաքացիներ, իմ սիրելի ընկերներ Ուկրաինայում, և ես այսօր չեմ կարող զգացմունքային չլինել, քանի որ իմ սիրտը Կիևում է։ Այսօր Վրաստանի խորհրդարանում, Վրաստանի պատմության մեջ և ոչ միայն խորհրդարանական կյանքում ամոթի օր է, երբ այս պահին իմ սիրելի թաղամասերից մեկում՝ Աբալոնում, Կիևում, ռուսական դիվերսիոն խմբերը գրոհում են պաշտպանական ուժերը, այդ թվում՝ քաղաքի պաշտպանությանը ներգրավված քաղաքացիներին: Մեծամասնությունը միանգամայն ամոթալի որոշմամբ հավաքեց մեծամասնական պատգամավորների ստորագրությունները և որոշեց Վրաստանի նախագահի կողմից այսօր հրավիրված խորհրդարանի նիստը չանցկացնել՝ խախտելով Վրաստանի Սահմանադրությունը: Վրաստանի պատմության մեջ առաջին անգամ չբացել Վրաստանի խորհրդարանի դահլիճը: Վրաստանի խորհրդարանի տխրահռչակ նախագահ Պապուաշվիլին, ում անունը պատմության մեջ չի մնա և կմնա միայն Կիևում կռվող հերոսների անունը, որոշել է դեմ գնալ Վրաստանի Սահմանադրությանը և փակել խորհրդարանի դահլիճը։ Փակել Վրաստանի քաղաքացիներին, փակել Ուկրաինային, փակել հերոսներին, ովքեր ընկան երեկ և այսօր, որովհետև մենք պետք է երգեինք Վրաստանի, Ուկրաինայի օրհներգը և ամբողջ աշխարհին ասեինք, որ մենք օկուպացված ենք, ագրեսիան գնում է դեպի Ուկրաինա»,- ասել է Խատիա Դեկանոիձեն։

Ընդդիմության ներկայացուցիչները խորհրդարանում երգել են Ուկրաինայի օրհներգը։