Քարոզչական մեքենան ամեն ինչ կօգտագործի։ Ուստի հուսով եմ, որ Մերաբիշվիլին կխուսափի նման քաղաքական հայտարարություններից,- այս մասին ասել է «Ազգային շարժման» անդամ Խատիա Դեկանոիձեն։

Դեկանոիձեին հարցրել են Վրաստանի ներքին գործերի նախկին նախարար Վանո Մերաբիշվիլիի՝ «Ուկրինֆորմ» մեդիա կենտրոնում արած հայտարարությունների մասին։

«Վանո Մերաբիշվիլիին պետք է հարցնել, թե ինչու է նա նման հայտարարություն անում ու խոսում այդ մասին։ Քարոզչական մեքենան օգտագործելու է բոլորին և ամեն ինչ։ Այդ իսկ պատճառով ես հույս ունեմ, որ Մերաբիշվիլին կխուսափի նման քաղաքական հայտարարություններից»,- ասել է Խատիա Դեկանոիձեն։

Մարտի 10-ին Վանո Մերաբիշվիլին «Ուկրինֆորմ» մեդիա կենտրոնում ասել է. «Որպես վրացի՝ ես ամաչում եմ, որ Վրաստանը չի մասնակցում, Ուկրաինայի դաշնակիցը չէ այս պատերազմին»։ Միաժամանակ Մերաբիշվիլին նշել է. «Մենք պատրաստվում ենք զանգվածային բողոքի ցույցեր սկսել, մեր հիմնական նպատակն է փոխել իշխանությունը և Վրաստան բերել արևմտամետ, ուկրաինամետ իշխանություն»։