Վրաստանի խորհրդարանի շենքի մոտ անցկացվող բողոքի ակցիայի ժամանակ ոստիկանությունը ձերբակալել է երկու անձի։

Ինչպես Վրաստանի Հանրային Հեռուստաընկերությանը հայտնել են Ներքին գործերի նախարարությունում, երկու անձ ձերբակալվել է Վրաստանի վարչական իրավախախտումների օրենսգրքի 173-րդ հոդվածով, որը վերաբերում է ոստիկանության օրինական պահանջին չենթարկվելուն։

Բողոքի ակցիան խորհրդարանի շենքի մոտ սկսվել է այն պահին, երբ խորհրդարանում ընթանում էր խորհրդարանական ժամանակավոր քննչական հանձնաժողովի նիստը։

Ակցիայի մասնակիցների խոսքով՝ հանձնաժողովի գործունեությունը նույնական է վրացական բանակի դատապարտման հետ, և նրանք չեն կարողանում համակերպվել դրա հետ։

Վրաստանի խորհրդարանում ընթանում է «2003-2012 թվականներին ռեժիմի և նրա քաղաքական պաշտոնյաների գործունեությունը հետաքննող ժամանակավոր քննչական հանձնաժողովի» նիստը։ Հանձնաժողովի նախագահը «Վրացական երազանք»-ի անդամ Թեա Ծուլուկիանին է։ Քննչական հանձնաժողովի այսօրվա նիստում հարցաքննվել են 2008 թվականին Վրաստանի զինված ուժերի միացյալ շտաբի խաղաղապահ գործողությունների շտաբի ղեկավար Մամուկա Ղուրաշվիլին և 2004-2006 թվականներին պետնախարար Գոգա Խաինդրավան։ Այսօր նույնպես կհարցաքննվի խորհրդարանի առաջին փոխխոսնակ Գիա Վոլսկին, ով 2004-2006 թվականներին զբաղեցրել է Վրաստանի պետնախարարի տեղակալի պաշտոնը։