Վրաստանի խորհրդարանի հետաքննչական հանձնաժողովին զուգահեռ խորհրդարանի դիմաց բողոքի ակցիա է ընթանում

Ռուսթավելի փողոցում՝ Վրաստանի խորհրդարանի շենքի մոտ, բողոքի ցույց է ընթանում։

Բողոքի մասնակիցները պնդում են, որ խորհրդարանի քննչական հանձնաժողովը դատում է վրացական բանակին, և իրենք չեն կարող դա ընդունել։

«Կրեմլի մասնաճյուղում ընթանում է վրաց գեներալների և վրացական բանակի դատավարությունը: Մենք պարզապես չենք կարող հանդուրժել վրացական բանակի դատավարությունը, այն մարդկանց դատը, ովքեր 2008 թվականին պահպանեցին մեր անկախությունը, պահպանեցին մեր պետականությունը, լեզուն, հայրենիքը և հավատքը: Կրեմլի մասնաճյուղում նստածների տեղը ոչ միայն այստեղ է, այլև բանտում:

Բացի այդ, բողոքի ակցիայի մասնակիցները խորհրդարանի շենքից դուրս գալու պահին բղավելով դիմավորել են Գոգա Խաինդրավային, ով այսօր հարցաքննվել է հանձնաժողովի նիստում։

Ի գիտություն, Վրաստանի խորհրդարանում ընթանում է «2003-2012 թվականներին ռեժիմի և նրա քաղաքական պաշտոնյաների գործունեությունը հետաքննող ժամանակավոր քննչական հանձնաժողովի» նիստը։ Հանձնաժողովի նախագահը «Վրացական երազանք»-ի անդամ Թեա Ծուլուկիանին է։ Քննչական հանձնաժողովի այսօրվա նիստում հարցաքննվել են 2008 թվականին Վրաստանի զինված ուժերի միացյալ շտաբի խաղաղապահ գործողությունների շտաբի ղեկավար Մամուկա Ղուրաշվիլին և 2004-2006 թվականներին պետնախարար Գոգա Խաինդրավան։ Այսօր նույնպես կհարցաքննվի խորհրդարանի առաջին փոխխոսնակ Գիա Վոլսկին, ով 2004-2006 թվականներին զբաղեցրել է Վրաստանի պետնախարարի տեղակալի պաշտոնը։