Վրաստանի խորհրդարանում այսօր բյուրոյի և լիագումար նիստեր չեն անցկացվի։ Տեղեկությունը տարածում է խորհրդարանի մամուլի գրասենյակը։

«Մայիսի 1-ին Վրաստանի խորհրդարանի պալատի վրա բողոքի ակցիայի մասնակիցների կողմից իրականացված հարձակման հետևանքով տուժել են օրենսդիր մարմնի շենքը և ենթակառուցվածքները, հետևաբար, այսօր՝ մայիսի 2-ին, նախատեսված միջոցառումները (բյուրո և լիագումար նիստեր) չեն անցկացվի խորհրդարանի պալատում։ Վրաստանի խորհրդարանի պալատում, համապատասխան կառույցների հետ միասին, այս պահին մաքրման և վերականգնման աշխատանքներ են իրականացվում»,- նշված է խորհրդարանի տարածած հաղորդագրության մեջ։

Խորհրդարանը պարզաբանում է, որ օրենսդիր մարմնում անվտանգության կարմիր մակարդակը կգործի մինչև ժամը 14:00-ն, իսկ հետո կակտիվանա դեղին մակարդակը։

«Կարմիր մակարդակի ժամանակ ոչ մի անձի չի թույլատրվի մտնել Վրաստանի խորհրդարան, բացառությամբ այն անձանց, որոնք սահմանում է խորհրդարանի աշխատակազմի ղեկավարը՝ սպառնալիքի առանձնահատկություններին և դրանից խուսափելու անհրաժեշտությանը։ Կարմիր մակարդակը մայիսի 2-ին ժամը 14:00-ից հետո կչեղարկվի, իսկ դեղին մակարդակը կակտիվանա, այդ ժամանակ այցելուների մուտքը խորհրդարանի պալատ կսահմանափակվի։ Շենքում թույլ կտան միայն Վրաստանի խորհրդարանի աշխատակիցներին»,- ասված է Վրաստանի խորհրդարանի տեղեկատվության մեջ։