Վրաստանի վարչապետ Իրակլի Կոբախիձեի և Ադրբեջանի նախագահ Իլհամ Ալիևի անձնական հանդիպումից հետո բանակցությունները շարունակվել են ընդլայնված ձևաչափով, որին մասնակցել են երկու երկրների կառավարությունների անդամները։

Կառավարության աշխատակազմի մամուլի ծառայության հաղորդմամբ՝ հանդիպման ընթացքում քննարկվել են երկու երկրների միջև աճող առևտրատնտեսական համագործակցությունը և այս առումով առկա ներուժի լիարժեք օգտագործման կարևորությունը։

«Զրույցի ընթացքում անդրադարձ է եղել նաև էներգետիկ ոլորտում սերտ գործընկերությանը և տարածաշրջանային կարևորության տրանսպորտային ու էներգետիկ նախագծերին, որոնք Վրաստանն ու Ադրբեջանը համատեղ իրականացնում են։ Դրանց թվում նշվել է Բաքու-Թբիլիսի-Կարս երկաթուղին, որը կարևոր դեր է խաղում տարածաշրջանային կապի ապահովման գործում։

Հանդիպմանը մասնակցել են արտաքին գործերի նախարար Մակա Բոճորիշվիլին, էկոնոմիկայի և կայուն զարգացման նախարար Մարիամ Քվրիվիշվիլին, կառավարության աշխատակազմի ղեկավար Լևան Ժորժոլիանին, Ադրբեջանում Վրաստանի արտակարգ և լիազոր դեսպան Զուրաբ Պատարաձեն, իսկ ադրբեջանական կողմից՝ արտաքին գործերի նախարար Ջեյհուն Բայրամովը, նախագահի արտաքին քաղաքականության հարցերով օգնական Հիքմեթ Հաջիևը, էկոնոմիկայի նախարար Միքայիլ Ջաբարովը, էներգետիկայի նախարար Փարվիզ Շահբազովը, թվային զարգացման նախարարը և Տրանսպորտի նախարար Ռաշադ Նաբիևը և Վրաստանում Ադրբեջանի արտակարգ և լիազոր դեսպան Ֆաիգ Գուլիևը», – ասվում է տարածված տեղեկատվության մեջ։