Մարտի 6-ին Բեռլինում պաշտոնապես կբացվի «ITB berlin 2023»-ը, որը կբացի Վրաստանի վարչապետ Իրակլի Ղարիբաշվիլին,- հայտնում է «ITB Berlin»-ի պաշտոնական կայքը։

Կազմակերպիչների խոսքով՝ Վրաստանի վարչապետի հետ Բեռլինում միջազգային զբոսաշրջության ցուցահանդեսի բացման արարողությանը կմասնակցեն Գերմանիայի փոխկանցլեր և տնտեսական հարցերի նախարար Ռոբերտ Հաբեկը, Բեռլինի քաղաքապետ Ֆրանցիսկա Գիֆը և Բեռլինի ցուցահանդեսի տնօրեն Դիրկ Ֆոհմանը։ Արարողությանը ներկա կլինեն ՄԱԿ-ի Զբոսաշրջության համաշխարհային կազմակերպության գլխավոր քարտուղար Զուրաբ Պոլոլիկաշվիլին և Առևտրի և զբոսաշրջության համաշխարհային խորհրդի նախագահ Ջուլիա Սիմփսոնը:

Ցուցահանդեսում Վրաստանի հիմնական կոնցեպտը «անսահման հյուրընկալությունն» է։

Վրաստանի զբոսաշրջության ազգային վարչության տեղեկատվության համաձայն՝ բացմանը կներկայացվի Վրաստանի մշակույթն ու էթնիկ բազմազանությունը՝ վրացական գինու մշակույթից մինչև ժամանակակից ավանգարդ արվեստ։ Բացման ցուցադրությունը ներառում է վրացական արվեստի գլուխգործոցներ և տարբեր ժանրեր: Կներկայացվի էթնո ջազ, երգեցողություն և էլեկտրոնային երաժշտություն։ Հանդիսավոր համերգին հանդիսատեսի առջեւ ելույթ կունենա վրացական աշխարհահռչակ «Սուխիշվիլի» ազգային բալետը։ Շոուն բաղկացած է վեց մասից, և Վրաստանի ազգային բալետի պարողների հետ միասին «Ռուսթավի» անսամբլը կկատարի ավանդական պոլիֆոնիկ երգեր, Վրաստանի ազգային սիմֆոնիկ նվագախումբը և նրա դիրիժոր Նիկոլոզ Ռաճվելին կներկայանան հանդիսատեսի առաջ։ Բացման արարողությանը կմասնակցեն աշխարհահռչակ օպերային սոպրանո Նինո Մաչաիձեն, վիրտուոզ դաշնակահարուհի Դուդանա Մազմանիշվիլին, ջութակահար Լիզա Բաթիաշվիլին, կոմպոզիտոր Դաթո Էվգենիձեն և երաժիշտ Նիկա Մաչաիձեն։

Մարտի 7-9-ը Բեռլինում կանցկացվի աշխարհի առաջատար միջազգային զբոսաշրջային ցուցահանդեսը։

Բեռլինի զբոսաշրջային ցուցահանդեսում Վրաստանի Զբոսաշրջության ազգային վարչությունը ներկայացված է Աջարիայի զբոսաշրջության և հանգստավայրերի դեպարտամենտի, Թբիլիսիի քաղաքապետարանի, զբոսաշրջային ասոցիացիաների, ուղղությունների կառավարման կազմակերպությունների, 44 տուրօպերատորների և 23 հյուրանոցների հետ միասին, ընդհանուր առմամբ մոտ 80 կազմակերպություն և ընկերություն:

«ITB Berlin»-ն անցկացվում է 1966 թվականից։ 2019 թվականին, մինչ համաշխարհային համաճարակը, ITB Berlin-ը հյուրընկալել էր 10 000 մասնակիցների աշխարհի 181 երկրներից: Ցուցահանդեսն ունեցել է 160 000 այցելու: