Վրաստանի կրթության և գիտության նախարար Գիորգի Ամիլախվարին առաջին տեղակալ է նշանակել Ալեքսանդրե Ծուլաձեին
Վրաստանի կրթության և գիտության նախարար Գիորգի Ամիլախվարին առաջին տեղակալ է նշանակել Ալեքսանդրե Ծուլաձեին։
Ալեքսանդրե Ծուլաձեն ավարտել է Իվանե Ջավախիշվիլիի անվան Թբիլիսիի պետական համալսարանի իրավաբանական ֆակուլտետը և Հռոմի «Լա Սապիենցա» համալսարանի իրավագիտության մագիստրատուրան։ Նա նաև ստացել է Թբիլիսիի պետական համալսարանի իրավագիտության դոկտորի աստիճան՝ «Summa Cum Laude» գնահատականով։
Ալեքսանդրե Ծուլաձեն 2010 թվականից ակադեմիական գործունեությամբ է զբաղվել Վրաստանի տարբեր բուհերում և ուսումնական հաստատություններում։ Նա ստացել է երկարաժամկետ հետազոտական կրթաթոշակ Կոլումբիայի համալսարանից (Նյու Յորք, ԱՄՆ), հետազոտական դրամաշնորհներ Մաքս Պլանկի միջազգային մասնավոր և համեմատական իրավունքի ինստիտուտից (Համբուրգ, Գերմանիա) և Վրաստանի Շոթա Ռուսթավելիի անվան ազգային գիտական հիմնադրամից։ 2019 թվականին նա Վրաստանի խորհրդարանի կողմից ընտրվել է որպես Վրաստանի Գերագույն դատարանի անժամկետ դատավոր։
Տեղեկությունը տարածում է Վրաստանի կրթության և գիտության նախարարության մամուլի ծառայությունը։