Վրաստանի այն քաղաքացիները, ովքեր ունեն տոմսեր՝ մասնակցելու Եվրոպայի առաջնությանը Վրաստանի հավաքականի հանդիպումներին, կկարողանան օգտվել սուբսիդավորվող ավիատոմսից։

Շաբաթվա վերջից կսկսվի սուբսիդավորվող ավիատոմսերի վաճառքը։

Կառավարության տվյալներով՝ Եվրո-2024-ի մինչև երեք հազար երկրպագուներ կկարողանան օգտվել Վրաստանի կառավարության կողմից Վրաստանի ազգային հավաքականին աջակցելու համար հունիսի 18-ին, 22-ին և 26-ին կազմակերպված հատուկ չարտերից և կկարողանան ավիատոմսեր գնել հատուկ, սուբսիդավորվող գնով։ Միակողմանի ավիատոմսի արժեքը կկազմի 195 եվրո։ Ըստ այդմ՝ երկկողմանի ավիատոմսի արժեքը 390 եվրո է։ Երկրպագուները հնարավորություն կունենան ինքնուրույն կազմել ճամփորդությունների ժամանակացույցը։

Չարտերային թռիչքները Թբիլիսիի և Քութայիսի միջազգային օդանավակայաններից կիրականացվեն Georgian Wings (Թբիլիսի), Georgian Airways (Թբիլիսի), Wizz Air (Քութայիսի) և Gasa (Թբիլիսի) ընկերության հետ համատեղ։ Չարտերային թռիչքները Թբիլիսիից և Քութայիսից կիրականացվեն Դորտմունդի, Համբուրգի, Քյոլնի և Դյուսելդորֆի ուղղությամբ և կհարմարեցվեն Վրաստանի հավաքականի հանդիպումների ժամանակացույցին։

Տեղեկության համար՝ Եվրոպայի առաջնության հետ կապված՝ Վրաստանի կառավարությունը կսուբսիդավորի չարտերային և կանոնավոր չվերթները դեպի Գերմանիա։