Վրաստանի արդարադատության նախարարությունը 2026 թվականին կհյուրընկալի ՄԱԿ-ի Հանրային ծառայությունների համաշխարհային ֆորումը
Վրաստանի արդարադատության նախարարությունը 2026 թվականին կհյուրընկալի ՄԱԿ-ի Հանրային ծառայությունների համաշխարհային ֆորումը։ Այս մասին հայտնում է Արդարադատության նախարարության մամուլի ծառայությունը։
Նրանց տվյալներով՝ Վրաստանում ՄԱԿ-ի հանրային ծառայությունների համաշխարհային ֆորումի անցկացման հնարավորությունը քննարկվել է Վրաստանի արդարադատության նախարար Ռատի Բրեգաձեի և ՄԱԿ-ի գլխավոր քարտուղարի տեղակալի հանդիպմանը։ Այս մասին հաստատող պաշտոնական նամակով ՄԱԿ-ը տեղեկացրել է Վրաստանի արդարադատության նախարարությանը։
ՄԱԿ-ի գլխավոր քարտուղարի տեղակալ Լի Ջունհուան շնորհակալություն է հայտնում Վրաստանի արդարադատության նախարարությանը պետական կառավարման աջակցության համար։
«Մենք շնորհակալություն ենք հայտնում պետական կառավարման՝ որպես կայուն զարգացման արդյունավետ մեխանիզմի ամրապնդմանն ուղղված ձեր աջակցության համար և անհամբերությամբ սպասում ենք Վրաստանի կառավարության հետ աշխատելուն՝ 2026 թվականի ֆորումին նախապատրաստվելու համար»,- ասված է նամակում։
Ռատի Բրեգաձեն 2023 թվականի դեկտեմբերին Ամերիկայի Միացյալ Նահանգներ կատարած պաշտոնական այցի շրջանակներում հանդիպել է ՄԱԿ-ի գլխավոր քարտուղարի տեղակալ Լի Ջունհուայի հետ։ Վրաստանի արդարադատության նախարարն ընդգծել է, որ արագ, արդյունավետ և սպառողի համար հարմար պետական ծառայությունները Վրաստանի արդարադատության նախարարության և կառավարության այցեքարտն են: Գերատեսչությունը մշտապես բարելավում է իր հասանելիությունը, այդ թվում՝ թվային և նորարարական տեխնոլոգիաների ներդրման միջոցով։
Տարբեր երկրների 800-ից 1000 ներկայացուցիչներ ամեն տարի մասնակցում են ՄԱԿ-ի Հանրային ծառայության ֆորումին, այդ թվում՝ կառավարության ղեկավարներ, առաջատար քաղաքական գործիչներ և տարբեր ոլորտների ներկայացուցիչներ: Ֆորումի շրջանակներում մասնակիցները քննարկում են ժամանակակից մարտահրավերները, նորարարական փորձը և ռազմավարական զարգացման հնարավորությունները հանրային ծառայությունների ուղղությամբ։