Վրաստանի արտաքին գործերի նախարարությունը հայտարարություն է տարածել՝ կապված Էնգուրի գետն անցնելիս օկուպացված տարածքում բնակվող Վրաստանի քաղաքացիների մահվան հետ:

«Վրաստանի արտաքին գործերի նախարարությունն իր խոր մտահոգությունն է հայտնում Էնգուրի գետն անցնելիս օկուպացված Գալիի շրջանում բնակվող Վրաստանի քաղաքացիների մահվան կապակցությամբ:

Վրաստանի երեք քաղաքացիներ փորձում էին անցնել Վրաստանի կառավարության կողմից վերահսկվող տարածք, որպեսզի խուսափեն Ռուսաստանի օկուպացիոն ռեժիմի կողմից սահմանված խտրական միջոցներից, անօրինական կալանքից, որն ավարտվեց մահվան ելքով:

Սա Ռուսաստանի ապօրինի օկուպացիայի ևս մեկ լուրջ մարդկային գին է և հստակ ցույց է տալիս Աբխազիայի և Ցխինվալի տարածաշրջանների բնակիչների կյանքի անտանելի պայմանները և անվտանգության և հումանիտար ծանր իրավիճակը:

Տարիներ շարունակ Աբխազիայի ու Ցխինվալիի շրջաններում ապրող մարդիկ պատանդ են եղել ռուսական օկուպացիայի կողմից:

Ռուսաստանի Դաշնությունը, որպես տեղում արդյունավետ վերահսկողություն իրականացնելու ուժ, լիովին կրում է պատասխանատվություն այս ողբերգության, ինչպես նաև բռնազավթված տարածքներում մարդու հիմնարար իրավունքների և ազատությունների ոտնահարման համար, որը վերահաստատեց Մարդու իրավունքների եվրոպական դատարանի հունվարի 21-ի վճռով:

Արտաքին գործերի նախարարությունն ակտիվացրել է իր տրամադրության տակ եղած բոլոր դիվանագիտական ​​լծակները՝ խնդիրը բոլոր համապատասխան միջազգային ձևաչափերում բարձր մակարդակի վրա բարձրացնելու համար:

Այսօրվա ողբերգական փաստն արդեն քննարկվել է ճգնաժամային հարցերով Հարավային Կովկասում և Վրաստանում ԵՄ հատուկ ներկայացուցչի հետ նախարարի հանդիպմանը:

«Վրաստանը բոլոր ջանքերը գործադրում է տեղում ապօրինի օկուպացիան դադարեցնելու, օկուպացված տարածքներում մարդու իրավունքների խախտումները դադարեցնելու և տեղի բնակչությանը ազատ տեղաշարժվելու թույլտվություն տալու համար», – ասված է Վրաստանի ԱԳՆ հայտարարության մեջ:

Շամգոնա գյուղի մոտակայքում փրկարարները Էնգուրի գետից դուրս են բերել երեք մարդու մարմին: Բացի այդ, ընթանում է մեկ այլ քաղաքացու որոնողափրկարարական աշխատանք: Ըստ առկա տեղեկատվության, քաղաքացիները փորձում էին Էնգուրի գետով, օկուպացված Թագիլոնի գյուղից անցնել դեպի Շամգոնա: