Վրաստանը ԵՏՄ երկրներում իր արտադրանքի արտահանման և վաճառքի նպատակով պետք է օգտագործի Հայաստանի հնարավորությունները և ազատ առևտրի գոտիների առկայությունը: Այս մասին Թբիլիսիում  Գիորգի Մարգվելաշվիլիի հետ համատեղ ասուլիսում ասել է ՀՀ նախագահ Սերժ Սարգսյանը:

Սարգսյանի խոսքով՝ Հայաստանում գրանցված ցանկացած ընկերություն կարող է  օգտակար լինել Վրաստանի համար:

 «Իրանի հետ սահմանին ազատ առևտրի գոտին Վրաստանի համար հիանալի հնարավորություն է, քանի որ Իրանը վաճառահանման մեծ շուկա է», – ասել է նա:

Նա նաև ընդգծել է, որ վրացի գործընկերոջ հետ հանդիպման ժամանակ քննարկվել են տարածաշրջանի անվտանգության և կայունության մասին հարցերը:

«Մենք համակարծիք ենք, որ երկարաժամկետ հակամարտությունները պետք է միայն համաձայնեցված ձևաչափերում խաղաղ բանակցությունների միջոցով լուծվեն»:

Նշենք, որ Հայաստանի նախագահ Սերժ Սարգսյանը երկօրյա պաշտոնական այցով գտնվում է Վրաստանում:

Այցի շրջանակներում Հայաստանի նախագահը հանդիպումներ կունենա  վարչապետ Գիորգի Կվիրիկաշվիլիի, խորհրդարանի խոսնակ Իրակլի Կոբախիձեի, Վրաստանի պատրիարք և  կաթողիկոս Իլյա Երկրորդի հետ: