Վրաստանը նշում է ԵՄ անդամակցության թեկնածուի կարգավիճակը: Վրաստանի տարբեր շրջանների փողոցներում և շենքերում փակցված են Վրաստանի և Եվրամիության դրոշները։

Բացի այդ, Վրաստանին ԵՄ անդամակցության թեկնածուի կարգավիճակ տալու կապակցությամբ, այսօր Թբիլիսիում, ժամը 17:00-ին, Ազատության հրապարակում տեղի կունենա համընդհանուր ժողովրդական տոնախմբություն։

Եվրոպական խորհուրդը երեկ՝ դեկտեմբերի 14-ին, Վրաստանին շնորհել է ԵՄ անդամակցության թեկնածու երկրի կարգավիճակ։

Նոյեմբերի 8-ին Եվրահանձնաժողովը դիմել է Եվրոպական խորհրդին՝ Վրաստանին ԵՄ թեկնածու երկրի կարգավիճակ շնորհելու դրական հանձնարարականով։

«Վրացական երազանքի» նախագահ Իրակլի Կոբախիձեն 2022 թվականի մարտի 2-ին հայտարարեց, որ Վրաստանը դիմել է Եվրամիությանը՝ անդամակցության թեկնածուի կարգավիճակ ստանալու համար։ Նույն թվականի մարտի 3-ին անդամակցության պաշտոնական դիմումը ստորագրեց Վրաստանի վարչապետ Իրակլի Ղարիբաշվիլին։