Վրացիներն այժմ ունեն հստակ ճանապարհ, անելիքներ, ժամանակացույց, շարունակեք աշխատել դրա վրա, դուք ճիշտ ուղու վրա եք,- այս մասին հայտարարել է Եվրամիության արտաքին գործերի և անվտանգության քաղաքականության հարցերով գերագույն ներկայացուցիչ Ջոզեֆ Բորելը, ի պատասխան լրագրողների այն հարցին, թե որն է նրա ուղերձը Վրաց ժողովրդին:

«Իմ ուղերձն այն է, որ սա իրենց համար քայլ առաջ է։ Չպետք է բացասական վերաբերվեն դրան։ Այժմ նրանք հստակ ճանապարհ ունեն, այժմ նրանք անելիքներ ունեն, ունեն ժամանակացույց, ուստի սա կարևոր քայլ է առաջ, շարունակեք աշխատել դրա վրա, դուք ճիշտ ուղու վրա եք»,- ասել է Բորելը։

Սակայն հարցին, թե երբ Վրաստանը կհամապատասխանի չափանիշներին, նրան թեկնածուի կարգավիճակ կտրամադրվի, Ջոզեֆ Բորելը պատասխանեց, որ իսկապես այդպես կլինի։

«Հենց այդպես է: Երբ այս չափանիշները կատարվեն, թեկնածուի կարգավիճակը ավտոմատ կերպով կտրվի», – ասել է Ջոզեֆ Բորելը:

Այսօր Բրյուսելում տեղի կունենա Եվրամիության գագաթնաժողովը, որի ժամանակ եվրոպացի առաջնորդները պետք է որոշեն Վրաստանի, Ուկրաինայի և Մոլդովայի՝ Եվրամիությանը անդամակցության հայտերը։

Անցյալ շաբաթ Եվրահանձնաժողովը հրապարակեց իր գնահատականը երեք ասոցացված երկրների հայտարարություններին, ըստ որոնց՝ Եվրահանձնաժողովը առաջարկել է Եվրախորհրդին Ուկրաինային և Մոլդովային տրամադրել Եվրամիության թեկնածուի կարգավիճակ՝ պարտադիր պայմաններով, իսկ Վրաստանին՝ եվրոպական հեռանկար, գնահատվի թե ինչպես է այն կատարում պայմանները մինչ թեկնածուի կարգավիճակ ստանալը։