«Վրացական երազանք» կուսակցության հաղորդմամբ, բարձրաստիճան խորհրդարանական պատվիրակությունը գտնվում է Չինաստանի Ժողովրդական Հանրապետությունում և ռազմավարական հանդիպումներ է անցկացնում երկրների միջև համագործակցությունը խորացնելու համար։

Խորհրդարանական պատվիրակության կազմում են քաղաքական խորհրդի անդամ, խորհրդարանի փոխխոսնակ Գիորգի Վոլսկին, քաղաքական խորհրդի անդամ, արտաքին հարաբերությունների հանձնաժողովի նախագահ Նիկոլոզ Սամխարաձեն, կրթության, գիտության և երիտասարդության հարցերի հանձնաժողովի նախագահ Մարիամ Լաշխին, տնտեսական քաղաքականության հանձնաժողովի նախագահ Շոթա Բերեկաշվիլին և ագրարային հարցերի հանձնաժողովի նախագահ Գելա Սամխարաուլին։

«Այցի ընթացքում վրացի քաղաքական գործիչները բազմաոլորտային հանդիպումներ են ունեցել Չինաստանի իշխող կուսակցության, Չինաստանի Ժողովրդական Կոնգրեսի, Կրթության նախարարության Լեզվի և կրթության համագործակցության կենտրոնի (CLEC), Չինաստանի Առևտրի պալատի (CCTIP), Շենժենի մունիցիպալ կառավարության և առաջատար տեխնոլոգիական կորպորացիաների հետ։ Վրաստանը համարվում է աշխարհագրական նշանակության պետություն, որը Եվրոպայի և Ասիայի միջև միջմայրցամաքային տրանսպորտային միջանցքի հիմնական ցանցային հանգույցն է։ Տարանցիկ ենթակառուցվածքների ֆունկցիոնալ նշանակությունը զգալիորեն աճել է 2022 թվականից ի վեր, ինչը արտացոլվում է բեռնափոխադրման 30 տոկոս աճով։

Եվրամիության պաշտոնական դիրքորոշումները հաստատում են տարածաշրջանային համագործակցության միջազգային կարևորությունը։ Չինաստանի համար Վրաստանի հետ հարաբերությունների ամրապնդումը եվրոպական շուկաներին միանալու այլընտրանքային մեխանիզմի ձևավորման բաղադրիչ է, ինչը հատկապես արդիական է հյուսիսային տրանսպորտային ուղիների գործունեության սահմանափակումների աշխարհաքաղաքական համատեքստում։

Այցի հիմնական նպատակներն են միջկուսակցական մեխանիզմների ամրապնդումը, Չինաստան-Վրաստան ռազմավարական գործընկերության բազմաոլորտային զարգացումը կրթության, գյուղատնտեսության և տնտեսական համագործակցության ոլորտներում, որը ներկայացնում է վրաց ժողովրդի սոցիալ-տնտեսական շահերը և Վրաստանի պատրաստակամությունը կարևոր դեր խաղալու Արևելքի և Արևմուտքի միջև։ Վրաստանի՝ որպես տարանցիկ պետության, կարողությունները ընդգծում են դրա համակարգային կարևորությունը Եվրասիական առևտրի նոր կոնֆիգուրացիայում, որտեղ երկիրը բազմակողմ ազատ առևտրի համաձայնագրերի գործիքների միջոցով ապահովել է 2.3 միլիարդ սպառողների շուկա մուտք գործելը», – ասվում է հաղորդագրության մեջ։

Պատվիրակության անդամ, խորհրդարանի փոխխոսնակ Գիորգի Վոլսկու խոսքով՝ «Միջին միջանցքի կարևորության մասին խոսվել է երկար ժամանակ, բայց այսօր այս թեման չափազանց կարևոր է բոլորի համար՝ թե՛ Արևելքի, թե՛ Արևմուտքի համար, և այս երկու շուկաների կապը հնարավոր չէ իրականացնել առանց Միջին միջանցքի»։

Նրա խոսքով՝ «Վրաստանի աշխարհաքաղաքական դիրքը համապատասխանում է պատմական Մետաքսի ճանապարհի զարգացման համար անհրաժեշտ չափանիշներին, և Վրաստանի միջոցով տեղի կունենան զգալի փոփոխություններ, որոնք, առաջին հերթին, դրական ազդեցություն կունենան վրաց ժողովրդի տնտեսական և սոցիալական վիճակի վրա»։