Ուկրաինայի նախագահ Վոլոդիմիր Զելենսկու խոսքով՝ Եվրամիության առաջնորդների մեծ մասն աջակցել է իր ներկայացրած «հաղթական ծրագրին»։

Այս մասին Վոլոդիմիր Զելենսկին հայտարարել է ԵՄ առաջնորդների գագաթնաժողովից հետո կայացած մամուլի ասուլիսում։

Ուկրաինայի նախագահը ղեկավարների հետ հանդիպումը արդյունավետ է անվանել։

Զելենսկին կենտրոնացել է նաև առանձին անդամ գործընկերների հետ ունեցած զրույցների վրա, այն երկրների ղեկավարների հետ, որոնցից կախված է Ուկրաինայի հզորացումը։

«Այս երկրները մեծ ազդեցություն ունեն մեզ հեռահար զենքով զինելու կամ չզինելու վրա։ Այն երկրների շարքում, որոնց հետ ես խոսել եմ զենքի այս տեսակի մասին, կային նաև դրական ազդակներ։ Մենք իսկապես ցանկանում ենք, որ ԱՄՆ-ի դիրքորոշումը՝ որպես Ուկրաինայի պաշտպանության գլխավոր դոնոր, լինի դրական և վճռական»,- ասել է Զելենսկին։

Նրա խոսքով, եթե գործընկերները չաջակցեն «հաղթական ծրագրին», որը ներառում է թե՛ սպառազինություն, թե՛ ՆԱՏՕ-ին անդամակցություն, թե՛ տնտեսական ջանքեր, դա կլինի Ռուսաստանի համար արտոնություն եւ մեծ սխալ։

«Ուկրաինայի թուլությունը Ռուսաստանի ուժն է։ Կարծում եմ՝ դա մեծ սխալ կլինի»,- ասել է Վոլոդիմիր Զելենսկին։