Ուկրաինայի նախագահ Վլադիմիր Զելենսկին զրուցել է Լեհաստանի վարչապետ Դոնալդ Տուսկի հետ։ Զելենսկին այս մասին գրել է սոցիալական ցանցերում։

Դոնալդ Տուսկից բացի, Զելենսկին հեռախոսազրույց է ունեցել նաև Մեծ Բրիտանիայի վարչապետ Քեյր Սթարմերի, Իտալիայի վարչապետ Ջորջիա Մելոնիի և ՆԱՏՕ-ի գլխավոր քարտուղար Մարկ Ռուտտեի հետ։

Զելենսկին նշել է, որ զրույցի թեման ռուսական անօդաչու թռչող սարքերի կողմից Լեհաստանի օդային տարածքի խախտումն էր։ Ուկրաինայի առաջնորդը նշում է, որ ռուսական անօդաչու թռչող սարքերը նախկինում էլ են խախտել ՆԱՏՕ-ի անդամ պետության օդային տարածքը, սակայն այս անգամ անօդաչու թռչող սարքերի թիվը շատ ավելի մեծ էր։

«Անօդաչու թռչող սարքերը մուտք են գործել ոչ միայն Ուկրաինայի տարածքից, այլև Բելառուսից։ Եվ մենք բոլորս հասկանում ենք, որ սա Ռուսաստանի կողմից լարվածության բոլորովին այլ մակարդակ է։ Մենք պետք է նրանց համապատասխան պատասխան տանք», – գրել է Զելենսկին։

Ուկրաինայի նախագահը նաև նշում է, որ Դոնալդ Տուսկը զրույցի ընթացքում իրեն տեղեկացրել է անօդաչու թռչող սարքերի հայտնաբերված մասերի մասին, որոնք իրանական և ռուսական արտադրության էին։

«Ռուսաստանի այս անամոթ վարքագծի համար կան մի քանի պատճառներ, և դրանք բոլորի համար բացարձակապես ակնհայտ են։ Մենք պետք է աշխատենք համատեղ ՀՕՊ համակարգի վրա և ստեղծենք Եվրոպայի վրա արդյունավետ օդային վահան։ Ուկրաինան դա վաղուց է առաջարկում, և մենք ունենք կոնկրետ լուծումներ։ Ես լեհական կողմին առաջարկեցի մեր օգնությունը ռուսական անօդաչու թռչող սարքերի, մասնավորապես՝ «Շահիդների» ոչնչացման համար անձնակազմի պատրաստման և վերապատրաստման գործում։ Մենք Դոնալդի հետ համաձայնության եկանք ռազմական մակարդակով համապատասխան համագործակցության շուրջ։ Մենք նաև կհամակարգենք մեր գործողությունները ՆԱՏՕ-ի բոլոր անդամ պետությունների հետ», – գրում է Ուկրաինայի նախագահը։