Ուկրաինայի նախագահ Վոլոդիմիր Զելենսկին հայտարարել է, որ կան որոշումներ, որոնք կարող են կայացվել առաջիկա շաբաթների և ամիսների ընթացքում Ուկրաինայի և բոլորի համար, ովքեր ցանկանում են պատերազմի արդար ավարտ։

«Այժմ պատրաստվում ենք բավականին ակտիվ աշխատանքի։ Դեկտեմբերին նախատեսվում են բանակցություններ և հանդիպումներ։ Կան որոշումներ, որոնք կարող են կայացվել այս շաբաթների և ամիսների ընթացքում՝ հանուն մեր ընդհանուր անվտանգության՝ հանուն Ուկրաինայի և բոլորի համար, ովքեր իսկապես ցանկանում են, որ այս պատերազմն ավարտվի հնարավորինս արագ և ամենակարևորը՝ արդարացիորեն», – ասել է Զելենսկին իր ամենօրյա ուղերձում։

Ուկրաինայի նախագահը չի հստակեցրել, թե ինչ են նշանակում այս որոշումները։

Բացի այդ, Վոլոդիմիր Զելենսկին տեսաուղերձում նշել է, որ լսել է Ուկրաինայի գերագույն գլխավոր հրամանատար Ալեքսանդր Սիրսկու հայտարարությունը առաջնագծում տիրող իրավիճակի և Կուրսկի շրջանում ընթացող գործողության մասին։