Եվրոպական հանձնաժողովի նախագահ Ուրսուլա ֆոն դեր Լեյենը հայտարարել է, որ ԱՄՆ-ԵՄ առևտրային համաձայնագրի շրջանակներում բոլոր ոլորտների, այդ թվում՝ ավտոմեքենաների և դեղագործության վրա կգործի 15 տոկոս բազային սակագին։

«15 տոկոսը վատ թիվ չէ։ Սա մեր ձեռք բերած լավագույն արդյունքն է։ Այն վերաբերում է ամեն ինչին», – ասել է ֆոն դեր Լեյենը։

Բացի այդ, ինչպես բացատրել է ֆոն դեր Լեյենը, որոշ կարևոր ապրանքների վրա սակագները լիովին կվերացվեն։

«Մենք նաև համաձայնեցինք, որ մի շարք ռազմավարական ապրանքների վրա զրոյական սակագներ կլինեն։ Դրանց թվում են ինքնաթիռները և դրանց մասերը, որոշ քիմիական նյութեր, կիսահաղորդչային սարքավորումներ, որոշ գյուղատնտեսական ապրանքներ, բնական պաշարներ և կարևորագույն հումք։ Մենք այս ցանկին կավելացնենք ավելի շատ ապրանքներ», – ասել է ֆոն դեր Լեյենը։

Խոսելով ռուսական էներգետիկ ռեսուրսների խնդրի մասին՝ ֆոն դեր Լեյենը նշել է, որ ռուսական նավթի և գազի բազմաթիվ ապրանքներ դեռևս մտնում են ԵՄ։

«Մենք այլևս սա չենք ուզում, և մենք պետք է ամբողջությամբ դադարեցնենք ռուսական վառելիքի ներմուծումը։ Ահա թե ինչու ամերիկյան հեղուկացված բնական գազ (LNG) գնելը լավ հնարավորություն է։ Մեր հաշվարկներով՝ մենք կարող ենք տարեկան գնել 250 միլիարդ խորանարդ մետր գազ երեք տարվա ընթացքում», – ասաց ֆոն դեր Լեյենը։