Հորմուզի նեղուցի շրջափակումը շատ վնասակար է, նավարկության ազատության վերականգնումը մեզ համար չափազանց կարևոր է,- ասել է Եվրոպական հանձնաժողովի նախագահ Ուրսուլա ֆոն դեր Լեյենը։

«Մենք մտահոգված ենք, որ Լիբանանի վրա շարունակական հարձակումները կարող են խափանել ամբողջ գործընթացը։ Մերձավոր Արևելքում և Պարսից ծոցում կայունություն չի կարող լինել, եթե Լիբանանը կրակի մեջ է։ Հետևաբար, մենք կոչ ենք անում բոլոր կողմերին հարգել Լիբանանի ինքնիշխանությունը և ապահովել ռազմական գործողությունների լիակատար դադարեցումը։ Առաջին հերթին կարևոր է անդամ պետությունների միջև ամուր համակարգումը, քանի որ ցանկացած ճգնաժամի դեպքում մեր ուժը միասնության մեջ է», – ասել է ֆոն դեր Լեյենը։

Միևնույն ժամանակ, Ուրսուլա ֆոն դեր Լեյենը նշել է, որ պատերազմի սկսվելուց ի վեր 44 օրվա ընթացքում ԵՄ-ի կողմից բրածո վառելիքի ներմուծման վրա ծախսերը աճել են ավելի քան 22 միլիարդ եվրոյով։

«Սա ցույց է տալիս, թե որքան խորն է այս ճգնաժամը ազդում մեր տնտեսության վրա։ Նույնիսկ եթե ռազմական գործողությունները անմիջապես դադարեցվեն, էներգամատակարարման խափանումները կշարունակվեն որոշ ժամանակ։ Ահա թե ինչու մենք քննարկել ենք մի շարք միջոցառումներ, որոնք կներկայացնենք հաջորդ շաբաթ Կիպրոսում կայանալիք ոչ պաշտոնական գագաթնաժողովում», – ասել է ֆոն դեր Լեյենը։