Պատերազմի պատճառով Ուկրաինայից եվրոպական երկրներ մեկնած մարդիկ զանգվածաբար վերադառնում են հայրենիք։ Վերջին տվյալներով՝ հարկադիր վերաբնակների 60 տոկոսը վերադարձել է երկիր։ Ուկրաինական լրատվամիջոցները տեղեկությունը տարածել են երկրի ներքին գործերի նախարարի խորհրդական Վիկտոր Անդրուսիվին հենվելով։

Նա ասել է, որ 7,6 միլիոն մարդ լքել է երկիրը Ուկրաինա Ռուսաստանի լայնածավալ ներխուժումից հետո:

«Չնայած ռիսկերին, մենք նկատում ենք, որ ուկրաինացիները զանգվածաբար վերադառնում են հայրենիք։ Նման մարդիկ արդեն 4,8 միլիոն են։ Երկրից հեռացածների գրեթե 60 տոկոսը վերադարձել է»,- ասել է նախարարի խորհրդականը։

Անդրուսիվի խոսքով՝ երկիր վերադարձող ուկրաինացիների թիվը կրկին կավելանա։

«Արտասահմանում ապրելու պայմանները հազվադեպ են լավ: Շատ դեպքերում այդ մարդիկ ստիպված են վարձակալել թանկարժեք տներ կամ ապրում են մարզասրահներում: Դժվար է որակյալ ծառայություն գտնելը, դրա համար անհրաժեշտ է լեզվի լավ իմացություն։ Ուստի պետք չէ վախենալ, որ ուկրաինացիները չեն վերադառնա իրենց հայրենիք»,- ասել է նախարարի խորհրդականը։