Ուկրաինայի իշխանությունները սկսել են Դոնեցկի Ռուսաստանի կողմից չգրավված տարածքներից պարտադիր տարհանման գործընթացը
Ուկրաինայի իշխանությունները սկսել են Դոնեցկի Ռուսաստանի կողմից չգրավված տարածքներից պարտադիր տարհանման գործընթացը։ Այս մասին տեղեկություն է տարածում Ուկրաինայի փոխվարչապետ Իրինա Վերեշչուկը։
«Այսօր Կրոպիվնիցկ է ժամանել առաջին գնացքը՝ կանայք, երեխաներ, ծերեր։ Մենք բոլորին դիմավորեցինք և տեղավորեցինք»,- ասել է Վերեշչուկը։
Հիշեցնենք, որ Ուկրաինայի իշխանությունները Դոնեցկի մարզից պարտադիր տարհանումը կապում են ձմեռային սեզոնի մոտենալու հետ։ Կիևում հայտարարում են, որ Դոնեցկի մարզում, որի մի մասը վերահսկվում է Կիևի, իսկ մյուս մասը՝ Ռուսաստանի կողմից, ռազմական գործողությունների պատճառով վնասվել են ջեռուցման և էլեկտրական համակարգերը, ինչի պատճառով քաղաքացիների համար անհնար է մնալ այնտեղ ձմռանը:
Ուկրաինայի իշխանությունները պատասխանատվություն են կրում քաղաքացիների տեղափոխման, բնակեցման և ֆինանսական աջակցության համար։ Պարտադիր տարհանումից հետո քաղաքացուն կտրվի ժամանակավոր տեղահանվածի վկայական։ Այն մարդիկ, ովքեր հրաժարվում են պարտադիր տարհանումից, փաստաթուղթ կստորագրեն, որ իրենք են պատասխանատու իրենց և իրենց երեխաների կյանքի և առողջության համար։