Ուկրաինայի իշխանությունները հայտնում են Դոնեցկի մարզի Կուրախովոյի մերձակայքում գտնվող ջրամբարի ամբարտակի վնասման մասին
Դոնեցկի պետական ադմինիստրացիան հաստատել է Կուրախովոյի ջրամբարի պատվարի վնասման մասին տեղեկությունը։ Վարչակազմի ղեկավար Վադիմ Ֆիլաշկինը հայտարարում է, որ դա ռուսական հարձակման արդյունք է։
«Այս հարվածը պոտենցիալ վտանգ է ներկայացնում Վոլչյա գետի երկայնքով բնակավայրերի համար՝ ինչպես Դոնեցկի, այնպես էլ Դնեպրոպետրովսկի մարզերում։ Ժամը 16:00-ի դրությամբ պարզվել է, որ Մեծ Նովոսելովկի համայնքում գետի մակարդակը բարձրացել է 1,2 մետրով»,- գրել է Ֆիլաշկինը։
Կուրախովո քաղաքի ռազմական վարչակազմի ղեկավար Ռոման Պադունը նույնպես հաստատել է ամբարտակի վնասման և Վոլչյա գետում ջրի մակարդակի բարձրացման մասին տեղեկությունը։
«Մեզ հայտնի է, որ ջուրը հոսում է Տերնովի ամբարտակի հարեւանությամբ գտնվող գյուղեր։ Մենք չենք կարող հաստատել պատնեշի վնասի բնույթն ու լրջությունը: Մենք չենք կարող ստուգել ամբարտակը մշտական կրակոցների պատճառով»,- ասաց նա։
Ուկրաինական սոցցանցերում գրված է, որ ամբարտակը քանդել են ռուսները՝ Կուրախովոյում տեղակայված ուկրաինացի զինվորականների և հյուսիսում տեղակայված զորքերի մատակարարման ճանապարհները հեղեղելու համար։
Իսկ ռուսական Telegram-ի ալիքները սկսում են ասել, որ ամբարտակը պայթեցրել են ուկրաինացիները՝ ռուսական բանակի առաջխաղացումը խոչընդոտելու համար։