Ուկրաինայի գլխավոր շտաբի տվյալներով՝ երկրի պաշտպանական ուժերը հարձակվել են Ռուսաստանի Էնգելս քաղաքի նավթամթերքների բազայի վրա
Ուկրաինայի պաշտպանության ուժերը հարձակում են իրականացրել Սարատովի մարզի Էնգելս քաղաքի նավթամթերքների բազայի վրա։
Այս մասին հայտնել են Ուկրաինայի գլխավոր շտաբում։
Ուկրաինական կողմը նշում է, որ նավթային այս բազան վառելիք է մատակարարել Էնգելսի ռազմական օդանավակայանին, որտեղ տեղակայված է ռուսական ռազմավարական ավիացիան։
Գլխավոր շտաբը նշում է, որ նավթային բազայի վրա հարվածը լուրջ լոգիստիկ խնդիրներ է ստեղծում ռուս օկուպանտների ռազմավարական ավիացիայի համար և զգալիորեն նվազեցնում է ուկրաինական քաղաքներին և քաղաքացիական օբյեկտներին հարվածներ հասցնելու նրանց հնարավորությունը։
Սարատովի և Էնգելսի վրա ուկրաինական անօդաչու թռչող սարքերի զանգվածային հարձակումների մասին հայտարարություն է արել նաև Սարատովի մարզի նահանգապետ Ռոման Բուսարգինը։ Նա նշել է, որ հարվածն իրականացվել է արտադրական օբյեկտներից մեկի վրա, թեեւ չի նշել, թե որ օբյեկտը։
Տեղական տելեգրամ ալիքները գրել են, որ հարձակման թիրախը եղել է նավթային բազան։ Տեղի բնակիչները խոսում են բազայում բռնկված հրդեհի մասին։
Ռուսաստանի պաշտպանության նախարարության տվյալներով՝ Սարատովի մարզում գիշերը ոչնչացվել է 11 անօդաչու թռչող սարք։ Գերատեսչության տվյալներով՝ ընդհանուր առմամբ 32 անօդաչու թռչող սարք են խոցել Ռուսաստանի տարբեր շրջանների վրա։