Ուկրաինական լրատվամիջոցների փոխանցմամբ, Ուկրաինայի պաշտպանության նախարար Ալեքսեյ Ռեզնիկովն առաջիկայում կազատվի զբաղեցրած պաշտոնից
Ուկրաինայի պաշտպանության նախարար Ալեքսեյ Ռեզնիկովն առաջիկայում կազատվի զբաղեցրած պաշտոնից, հայտնում է ուկրաինական «Ուկրաինսկայա պրավդա» հրատարակությունը՝ հենվելով Նախարարների կաբինետի և Գերագույն ռադայի իր աղբյուրների վրա։ Բացի այդ, այս մասին Telegram-ի ալիքում գրում է ժողովրդական պատգամավոր Յարոսլավ Ժելեզնյակը։
Ինչպես նշում է հրատարակությունը, պաշտպանության նախարար կարող է նշանակվել Պետական գույքի հիմնադրամի ղեկավար Ռուստեմ Ումերովը։ Ըստ լրատվամիջոցի՝ հաջորդ շաբաթ խորհրդարանը հավանաբար կքննարկի պաշտպանության նախարարին պաշտոնանկ անելու հարցը։ «Ուկրաինսկայա պրավդա»-ի աղբյուրների փոխանցմամբ՝ դիտարկվում է Ռեզնիկովի թեկնածությունը Մեծ Բրիտանիայում Ուկրաինայի դեսպանի պաշտոնում։
Օգոստոսի 10-ին «Ուկրաինսկայա պրավդան» գրել էր, որ նախագահ Վոլոդիմիր Զելենսկին պաշտպանության նախարարի պաշտոնում փոխարինող է փնտրում Ռեզնիկովին և դիտարկում է առնվազն երկու թեկնածուի։
Օգոստոսի 28-ի ասուլիսում Ռեզնիկովը հայտարարեց, որ նախագահի հետ քննարկել է այլ պաշտոնի անցնելու հնարավորությունը, թեև որոշումը պետք է կայացնի անձամբ Վոլոդիմիր Զելենսկին։