Ուկրաինական լրատվամիջոցները հայտնում են Ռուսաստանի դեմ դրոններով իրականացված մասշտաբային հարձակման մասին։ «Ուկրաինսկայա պրավդա»-ի տեղեկությամբ՝ օգոստոսի 2-ի գիշերը Ռուսաստանի մի քանի շրջաններում տեղի են ունեցել պայթյուններ, որոնց ուղեկցել է հակաօդային պաշտպանության համակարգերի ակտիվացումը։

Աչքով տեսածները պատմում են դրոնների հարձակման և մեծ հրդեհի մասին նավթավերամշակման գործարաններից մեկում։ Նրանց տեղեկացմամբ՝ սոցիալական ցանցերում տարածվել են տեսանյութեր, որտեղ երևում է մեծ հրդեհ, որը, ենթադրաբար, բռնկվել է Սամարայի մարզում գտնվող Նովոկույբիշևսկի նավթավերամշակման գործարանում։ Կադրերում լսվում են անօդաչու թռչող սարքերի շարժիչների և հակաօդային պաշտպանության համակարգերի կրակոցի նմանվող ձայներ։

Սամարայի մարզպետ Վյաչեսլավ Ֆեդորիշչևը հաստատել է դրոններով հարվածը Նովոկույբիշևսկում։ «Այսօր առավոտյան թշնամու դրոնները հարվածել են Նովոկույբիշևսկի արդյունաբերական օբյեկտներից մեկին։ Տեղում աշխատում են արտակարգ ծառայությունները», – գրել է նա իր «Թելեգրամ» ալիքում։

Մարզում ժամանակավորապես սահմանափակվել է բջջային ինտերնետի աշխատանքը, իսկ Սամարայի օդանավակայանը ժամանակավորապես դադարեցրել է գործունեությունը։

Դրոնները, ենթադրաբար, վնասել են նաև Պենզա քաղաքում գտնվող «Էլեկտրոպրիբոր» բաց բաժնետիրական ընկերությունը։ Ուկրաինական լրատվամիջոցների տեղեկացմամբ՝ այս ձեռնարկությունը անմիջականորեն կապված է Ռուսաստանի ռազմաարդյունաբերական ոլորտի հետ և մասնագիտացած է հրթիռների կառավարման ու կապի համակարգերի բաղադրիչների արտադրության մեջ։ Դրա մոտակայքում գտնվում է Ռուսաստանի միակ ռազմական գործարանը, որը արտադրում է մարտական գործողությունների կառավարման կետեր հակաօդային պաշտպանության ստորաբաժանումների համար՝ «Ռադիոգործարան», որը, ենթադրաբար, նույնպես վնասվել է։

Տեղացիները պայթյունների և հակաօդային պաշտպանության աշխատանքի մասին են խոսում նաև Ռյազանի մարզում։ Աչքով տեսածների խոսքով՝ մարզում գտնվող Դյագիլևոյի օդանավակայանի մոտ տեղի են ունեցել ուժեղ պայթյուններ։ Ռյազանի մարզպետ Պավել Մալկովը հայտարարել է, որ «մարզի տարածքում հակաօդային պաշտպանության և ռադիոէլեկտրոնային պայքարի միջոցներով խոցվել է դրոն»։ Նրա խոսքով՝ ոչ ոք չի տուժել, իսկ դրոնի բեկորները ընկել են ձեռնարկության տարածքում։

Դրոնային հարձակումների և հակաօդային պաշտպանության ակտիվացման մասին հաղորդում են նաև Լիպեցկի և Վորոնեժի մարզերի բնակիչները։