Ուկրաինական կողմի հաղորդմամբ՝ Զատկի հրադադարի ավարտից մի քանի ժամ անց Ռուսաստանը անօդաչու թռչող սարքերով հարձակումներ է իրականացրել Ուկրաինայի մի քանի շրջաններում
Զատկի հրադադարի ավարտից մի քանի ժամ անց Ռուսաստանը անօդաչու թռչող սարքերով հարձակումներ սկսեց Ուկրաինայի մի քանի շրջանների վրա։ Ուկրաինայի ռազմաօդային ուժերը տագնապ են հայտարարել Կիևի մարզում, ինչպես նաև Խերսոնում, Դնեպրոպետրովսկում, Չերկասիում, Նիկոլաևում և Զապորոժիեում։
Նիկոլաևի քաղաքապետ Ալեքսանդր Սենկևիչը հայտնել է, որ քաղաքում լսվում են պայթյունների ձայներ։
Տեղական իշխանությունները կոչ են արել Կիևի բնակիչներին անհապաղ տեղափոխվել մոտակա ապաստարաններ՝ անօդաչու թռչող սարքերի հարձակումների սպառնալիքի պատճառով։ Նիկոլաևի մարզի ղեկավար Վիտալի Կիմը ավելի ուշ հայտարարեց, որ քաղաքը հրթիռային հարձակման է ենթարկվել։
«Զոհեր կամ ավերածություններ չկան», – նշել է Կիմը։
Խերսոնում տեղի ունեցած հարձակման հետևանքով մեկ մարդ վիրավորվել է։
Ռուսաստանի նախագահ Վլադիմիր Պուտինի կողմից հայտարարված Զատկական զինադադարը կտևի ապրիլի 19-ի ժամը 18:00-ից մինչև ապրիլի 21-ի ժամը 00:00-ն։ Երկու կողմերն էլ միմյանց մեղադրում են հրադադարի խախտման մեջ։ Հրադադարի ժամկետի լրանալուց մի քանի ժամ առաջ Կրեմլի խոսնակ Դմիտրի Պեսկովը հայտարարեց, որ Պուտինը հրաման չի տվել այն երկարաձգելու համար։
Ավելի վաղ Վլադիմիր Զելենսկին հայտարարել էր, որ Զատկի զինադադարի մասին հայտարարությունից հետո մի քանի ժամվա ընթացքում Ռուսաստանը 26 հարձակում է իրականացրել Ուկրաինայի վրա։