Վլադիմիր Զելենսկին հայտարարում է, որ Ռուսաստանի օկուպացիոն ուժերի կազմում կռվում են Չինաստանի հարյուրավոր քաղաքացիներ
Ուկրաինայի նախագահի՝ Վլադիմիր Զելենսկու հայտարարությամբ, Ռուսաստանի օկուպացիոն ուժերի կազմում կռվում են Չինաստանի հարյուրավոր քաղաքացի։ Այս մասին Զելենսկին հայտարարել է «Ռամշտայն» ձևաչափով հանդիպման ժամանակ, որին նա միացել է Կրիվի Ռիհ քաղաքից։
Ուկրաինայի նախագահի խոսքով, չինացի քաղաքացիների մասնակցությունը պատերազմին նշանակում է, որ Ռուսաստանը փորձում է շարունակել պատերազմը՝ այդ թվում չինացիների կյանքի հաշվին։
«Այս պահին առկա տվյալներով՝ Չինաստանի առնվազն մի քանի հարյուր քաղաքացի կռվում է Ռուսաստանի օկուպացիոն ուժերի կազմում։ Սա նշանակում է, որ Ռուսաստանը ակնհայտորեն փորձում է շարունակել պատերազմը՝ նույնիսկ չինացիների կյանքի հաշվին։ Պուտինի համար Հյուսիսային Կորեայից եկած զինվորականները բավական չէին։ Այժմ նա փորձում է փոխհատուցել կորուստները՝ ևս մեկ ազգի՝ չինացիների ներգրավմամբ», – նշել է Զելենսկին։
Ուկրաինայի նախագահի խոսքով, անհրաժեշտ է, որպեսզի Ուկրաինան և նրա գործընկերները միասին աշխատեն Մոսկվայի վրա ճնշում գործադրելու ուղղությամբ։
Հիշեցնենք, որ ապրիլի 8-ին Վլադիմիր Զելենսկին հայտնել էր, որ Դոնեցկի մարզում ուկրաինացի զինվորականները գերեվարել են Չինաստանի երկու քաղաքացու, որոնք կռվում էին Ռուսաստանի բանակի կազմում։