Ուկրաինայի նախագահի՝ Վլադիմիր Զելենսկու հայտարարության համաձայն, Դոնեցկի տարածաշրջանի հարցով ամերիկյան կողմը քննարկում է երկու կողմերի համար ընդունելի ձևաչափի ստեղծումը, որը կարող է ենթադրել ապառազմականացված գոտի կամ ազատ տնտեսական գոտի։

Ուկրաինայի և ԱՄՆ-ի կողմից համատեղ մշակված 20 կետից բաղկացած խաղաղության ծրագրի ներկայացման ժամանակ Վլադիմիր Զելենսկին հայտարարել է, որ տարածքային հարցը ամբողջ ծրագրում ամենաբարդն է։

Զելենսկու խոսքով՝ Դոնեցկի, Լուգանսկի, Զապորոժիեի և Խերսոնի մարզերում զորքերի տեղակայման գիծը տվյալ համաձայնագրի ամսաթվի դրությամբ փաստացիորեն ճանաչված է որպես շփման գիծ։ Զելենսկին նշել է, որ այս հարցը քննարկելու համար անհրաժեշտ է ստեղծել աշխատանքային խումբ, որը կսահմանի հակամարտության ավարտի համար անհրաժեշտ ուժերի տեղաշարժը, ինչպես նաև հնարավոր ապագա հատուկ տնտեսական գոտիների պարամետրերը։

«Մենք այնպիսի իրավիճակում ենք, երբ ռուսները ցանկանում են դուրս գալ Դոնեցկի մարզից, իսկ ամերիկացիները փորձում են գտնել ճանապարհ, որպեսզի այդ “դուրս գալը” տեղի չունենա, քանի որ մենք դեմ ենք դուրս գալուն։ Նրանք ցանկանում են գտնել ապառազմականացված գոտի կամ ազատ տնտեսական գոտի, այսինքն՝ այնպիսի ձևաչափ, որը հաշվի կառնի երկու կողմերի մոտեցումները», – նշել է Զելենսկին։

Ուկրաինայի նախագահը պարզաբանել է, որ եթե ծրագրի առաջին տարբերակը, որը նախատեսում է պատերազմի ավարտ շփման գծից այն կողմ, ձախողվի, ապա գոյություն ունեն ևս երկու տարբերակ։ Առաջինը ռազմական գործողությունների շարունակությունն է։

Երկրորդ տարբերակը նախատեսում է, որ համաձայնագրի ուժի մեջ մտնելու համար Ռուսաստանը պետք է դուրս բերի իր զորքերը Դնեպրոպետրովսկի, Նիկոլաևի, Սումիի և Խարկովի մարզերից։ Սակայն, Զելենսկու խոսքով, պոտենցիալ հնարավոր է «ազատ տնտեսական գոտու» ստեղծումը Դոնեցկի և Լուգանսկի մարզերում, ինչպես նաև Էներգոդարում։

Ինչպես նշել է Վլադիմիր Զելենսկին, նա ցանկանում է տարածքների և ազատ տնտեսական գոտիների հարցը թողնել առաջնորդների մակարդակով որոշման համար։

Տեղեկացնենք, որ Ուկրաինայի նախագահ Վլադիմիր Զելենսկին ներկայացրել է Ուկրաինայի և ԱՄՆ-ի կողմից համատեղ մշակված խաղաղության ծրագրի քսան կետերը։