Ուկրաինայի նախագահ Վլադիմիր Զելենսկու խոսքով՝ չորս ուկրաինացի նավաստիներ գտնվում են «հութիների» գերության մեջ։ Այս մասին Զելենսկին հայտարարել է Կիևում գտնվող Մեծ Բրիտանիայի արտգործնախարարի հետ համատեղ մամուլի ասուլիսում։

Զելենսկու խոսքով՝ Ուկրաինան կաշխատի նրանց վերադարձի վրա։

«Իրավիճակը Կարմիր ծովում նույնպես շատ կարևոր է մեզ համար, քանի որ այն ազդել է Ուկրաինայի քաղաքացիների անվտանգության վրա։ Այժմ մեր չորս նավաստիները գտնվում են հութիների գերության մեջ»,- ասել է Զելենսկին։

Հիշեցնենք, որ երեկ երեկոյան ԱՄՆ-ը և Մեծ Բրիտանիան Ավստրալիայի, Կանադայի, Նիդեռլանդների և Բահրեյնի աջակցությամբ համատեղ հարվածներ են հասցրել Եմենում գտնվող «հութիների» օբյեկտներին։ Ավելի վաղ «հութները» հրթիռների և անօդաչու սարքերի միջոցով զանգվածային հարձակում էին գործել Կարմիր ծովում գտնվող նավերի վրա։