Ուկրաինայի նախագահ Վլադիմիր Զելենսկին հայտարարում է, որ ներկայումս կենտրոնացած է պատերազմի ավարտի բանակցությունների վրա, և նախագահական գրասենյակի նոր ղեկավարի նշանակման հարցը նրա համար առաջնահերթություն չէ, – այս մասին Զելենսկին ասել է մամուլի հետ զրույցում։

«Այսօր ես կենտրոնացած եմ խաղաղության համաձայնագրի մշակման վրա և, առաջին հերթին, աշխատում եմ ամերիկացիների հետ։ Հասկանում եմ, որ հասարակության որոշ անդամներ հարցեր ունեն գրասենյակի ղեկավարի վերաբերյալ։ Սակայն զարմացած եմ, որ այս կոնկրետ հարցը դարձավ ամենաակտուալներից մեկը, քանի որ հավատում եմ, որ ամենակարևորը պատերազմը ավարտելուն և անվտանգության ապահովմանը վերաբերող բոլոր հարցերն են», – նշել է Զելենսկին։

Նա հայտնել է, որ մի քանի խորհրդակցություն է անցկացրել նախագահի գրասենյակի ղեկավարի թեկնածուի ընտրության շուրջ։ Նրա խոսքերով՝ կան որոշ կազմակերպչական մանրամասներ։ Բացի այդ, Զելենսկին նշել է, որ թափուր են նաև էներգետիկայի և արդարադատության նախարարների պաշտոնները։

«Առաջնահերթությունը պատերազմի ավարտն է, ինչպես նաև իմ միջազգային աշխատանքը ԱՄՆ-ի և ցանկություն ունեցող երկրների կոալիցիայի հետ։ Կան բազմաթիվ այլ հարցեր, որոնց վրա աշխատում եմ, և դրանցից մեկը՝ գրասենյակի ղեկավարի նշանակումը, իրապես առաջնահերթ հարց չէ», – նշել է Զելենսկին։

Հիշեցնենք, որ Վլադիմիր Զելենսկին նոյեմբերի 28-ին հայտարարել էր Անդրեյ Երմակի պաշտոնից ազատման մասին։