«Կարևոր է, որ բոլորը տեսնեն՝ ինչ է հիմա անում Ռուսաստանը. յուրաքանչյուր քայլ, յուրաքանչյուր հարձակում, քանի որ սա իրականում պատերազմի ավարտը չէ», – այս մասին հայտարարել է Ուկրաինայի նախագահ Վլադիմիր Զելենսկին։

Նրա խոսքով՝ Ռուսաստանը զանգվածային հարվածներ է հասցրել Ուկրաինային, որի արդյունքում Կիրովոգրադի, Նիկոլաևի, Օդեսայի, Սումիի, Խարկովի, Խերսոնի և Չերնիգովի շրջաններում հազարավոր մարդիկ մնացել են առանց էլեկտրաէներգիայի։

Զելենսկու խոսքով՝ հարձակումներ են եղել նաև Դնեպրի և Չերկասի շրջանների վրա։

«Կարևոր է, որ բոլորը տեսնեն՝ ինչ է անում Ռուսաստանը հիմա։ Յուրաքանչյուր քայլ, յուրաքանչյուր հարձակում վկայում է, որ սա պատերազմն ավարտելու քայլ չէ։ Նրանք շարունակում են փորձել ոչնչացնել մեր պետությունն ու հնարավորինս մեծ ցավ պատճառել մեր ժողովրդին։ Այդ պատճառով մեզ անհրաժեշտ է աջակցություն ամեն ինչում, ինչը կնպաստի մարդկանց կյանքի պաշտպանությանը և պատերազմի ավարտին՝ հակաօդային պաշտպանության, առաջնագծում գտնվող մեր զինվորների ուժեղացման, հեռահար հնարավորությունների ընդլայնման և Ռուսաստանի նկատմամբ ճնշման ուժեղացման միջոցով։ Մեր դիվանագիտական բոլոր ջանքերը պետք է լինեն արդյունավետ, և դրա համար մենք պետք է ճնշում գործադրենք ագրեսորի վրա՝ նրանց ստիպելու դադարեցնել պատերազմը, որը հենց իրենք են սկսել», – նշել է Զելենսկին։

Հիշեցնենք՝ գիշերը Օդեսայի վրա կատարված հարձակման հետևանքով վնասվել են բնակելի շենքեր, վարչական ու քաղաքացիական շինություններ, ինչպես նաև հրդեհաշիջման մեքենա։ Վնասվածքների արդյունքում, նախնական տվյալներով, առնվազն չորս մարդ է տուժել։ Տեղում աշխատում է ավելի քան 100 հրշեջ։ Միևնույն ժամանակ, Նիկոլաևի շրջանում զանգվածային հարձակման հետևանքով վիրավորվել է առնվազն հինգ մարդ։