Ուկրաինան չի ճանաչում Դոնբասը՝ ոչ դե ֆակտո և ոչ դե յուրե՝ որպես Ռուսաստանի մաս, – այս մասին Ուկրաինայի նախագահ Վլադիմիր Զելենսկին հայտարարել է ուկրաինական մեդիայի հետ զրույցում։

«Ինչ վերաբերում է ռուսների դիրքորոշմանը, քանի դեռ այն չի փոխվել, դուք գիտեք՝ նրանք մեր Դոնբասն են ուզում։ Մեր դիրքորոշումը գործնական է, իրատեսական և արդարացի, մենք ամուր կանգնած ենք այդ դիրքի վրա – չենք ցանկանում զիջել մեր Դոնբասը։ Ամերիկացիները ցանկանում են կոմպրոմիս գտնել, առաջարկում են ազատ տնտեսական գոտի։ Կրկին ընդգծում եմ՝ ազատ տնտեսական գոտին չի նշանակում Ռուսաստանի Դաշնության ղեկավարություն», – հայտարարել է Զելենսկին։

Ուկրաինայի նախագահը նշել է, որ տարածքային հարցը քննարկվում է, սակայն Ուկրաինան չի ճանաչում Դոնբասի ժամանակավորապես օկուպացված մասը որպես ռուսական։

«Մենք՝ ոչ դե յուրե և ոչ դե ֆակտո, չենք ճանաչում Դոնբասը որպես Ռուսաստանի տարածք՝ ժամանակավորապես օկուպացված մաս։ Սակայն մենք քննարկում ենք տարածքային հարցը։ Գիտեք, սա է ամենակարևորը։ Մենք դեռ չունենք կոնսենսուս», – հայտարարել է Զելենսկին։

Զելենսկին նաև ասել է, որ հույս ունի՝ փաստաթղթերի ավարտից հետո հանդիպում կունենա Դոնալդ Թրամփի հետ։

Ուկրաինայի նախագահը խոսել է լրագրողների հետ բանակցությունների հաջորդ փուլի մասին։

Նրա խոսքով՝ ուկրաինական փաստաթղթերի ավարտից հետո մոտ օրերին ԱՄՆ-ի կողմից սպասվում են խորհրդակցություններ Ռուսաստանի հետ։

«Եվ դրանից հետո նրանք խորհրդակցություններ կանցկացնեն Ամերիկայի Միացյալ Նահանգների նախագահի հետ։ Այնուհետև մեր թիմերը կհանդիպեն միմյանց։ Կարծում եմ՝ մեր բանակցող թիմերը կհանդիպեն Միացյալ Նահանգներում։ Մոտ ապագայում, կարծում եմ՝ հնարավոր է նույնիսկ այս շաբաթավերջին։ Այս հանդիպումից հետո կտեսնենք, թե ինչ կլինի։ Մենք քննարկում ենք բարձր մակարդակով հանդիպում, առնվազն՝ Ամերիկայի Միացյալ Նահանգների նախագահի հետ», – հայտարարել է Զելենսկին։

Զելենսկին նշել է նաև, որ ներկայումս հանրաքվեի հարց չի քննարկվում, սակայն, եթե հրադադարի համաձայնություն ձեռք բերվի, Ուկրաինայի կառավարությունն ընտրությունների անցկացման համար պատրաստ է։

«Այսօր մեր գործընկերների հետ կրկին ընդգծեցի, որ ես պատրաստ եմ ընտրությունների։ Այնպես, որ ուկրաինացի ժողովուրդը ևս պատրաստ լինի, անհրաժեշտ է օրենսդիրների համագործակցությունը, սակայն առաջին հերթին ամենակարևորն է՝ հնարավորությունը լեգիտիմ ընտրությունների կամ լեգիտիմ արդյունքներով ընտրությունների անցկացման։ Դրա համար անհրաժեշտ է անվտանգության ենթակառուցվածք», – հայտարարել է Զելենսկին։