Վլադիմիր Զելենսկի. Կոնգրեսում դեմոկրատների հաղթանակը կարող է ամրապնդել ԱՄՆ-ի աջակցությունը Ուկրաինային
Ուկրաինայի նախագահը նշել է, որ ԱՄՆ Կոնգրեսի միջանկյալ ընտրություններում Դեմոկրատական կուսակցության հաղթանակը կարող է ամրապնդել Վաշինգտոնի աջակցությունը Ուկրաինային։ Զելենսկին այս մասին ասել է գերմանական ZDF հեռուստաընկերությանը տված հարցազրույցում։
«Մենք ունենք երկկուսակցական աջակցություն՝ երկու կուսակցություններից էլ։ Ես շնորհակալ եմ նաև հանրապետականներին, չնայած դեմոկրատները շատ հստակ են, որ աջակցում են Ուկրաինային և նրա օգնությանը», – ասել է Ուկրաինայի նախագահը։
Նրա խոսքով՝ դեմոկրատները խոսում են նաև ԱՄՆ-ի և Եվրոպայի միջև հարաբերությունների վերականգնման մասին, որոնք վերջին տարիներին որոշ չափով թուլացել են։
«Առանց այդ կապերի և հարաբերությունների շատ դժվար է դիմադրել Պուտինին», – նշել է Զելենսկին։
Ըստ Ուկրաինայի նախագահի՝ ԱՄՆ օգնության ավելացումը կարող է ազդել Ռուսաստանի նախագահ Վլադիմիր Պուտինի վրա և նրան մղել դադարեցնել պատերազմը։
«Եթե Կոնգրեսը հիմա սկսի խոսել ուժեղ ֆինանսական աջակցության կամ ռազմական օգնության մասին, ինչպես այսօր անում և ցույց է տալիս Եվրոպան, սա դրական գործոն կլինի, որը կազդի Պուտինի վրա։ Պուտինը կմտածի այն մասին, թե արդյոք իմաստ ունի շարունակել պայքարը և պատերազմը, երբ աջակցությունն աճում է», – ասել է Զելենսկին։
Նա նաև ասել է, որ ԱՄՆ-ի կողմից Ուկրաինային աջակցության ամրապնդումը կարող է նպաստել բանակցությունների մեկնարկին և խաղաղության հասնելուն։