Ուկրաինայի նախագահ Վլադիմիր Զելենսկին Կիև այցելած ՆԱՏՕ-ի գլխավոր քարտուղարի հետ քննարկել է մինչև ձմեռ Ուկրաինայի հակաօդային պաշտպանության ուժեղացման հարցը։ Այս մասին Զելենսկին հայտարարել է Ստոլտենբերգի հետ համատեղ մամուլի ասուլիսում։

Ուկրաինայի ղեկավարի խոսքով՝ ինքը Դաշինքի գլխավոր քարտուղարի հետ զրուցել է պաշտպանության առանցքային հարցերի շուրջ, քննարկել մարտադաշտում տիրող իրավիճակը և ուկրաինացի զինվորականների հնարավորությունները։

Զելենսկու խոսքով՝ անհրաժեշտ է ճնշում գործադրել ագրեսորի վրա, որպեսզի Ռուսաստանը նահանջի։

«Անհրաժեշտ է ուժեղացնել Ուկրաինայի հակաօդային պաշտպանությունը։ Մենք քննարկել ենք Ուկրաինայի էներգետիկ ենթակառուցվածքի վրա սպասվող հարձակումների հետ կապված իրավիճակը»,- ​​ասել է նա՝ նշելով, որ խնդրել է ավելացնել գործընկեր երկրների կողմից հակաօդային պաշտպանության համակարգերի մատակարարումը։

«Մենք պետք է միասին անցնենք այս ձմեռը, պաշտպանենք ենթակառուցվածքները և մեր ժողովրդի կյանքը»,- ասել է Զելենսկին։