Ուկրաինայի նախագահ Վլադիմիր Զելենսկին Բրյուսելում կայացած մամուլի ասուլիսին նշել է, որ գիտակցում է ԱՄՆ-ի կողմից ՆԱՏՕ-ին Ուկրաինայի անդամակցության ճանապարհի արգելափակումը, սակայն չի համարում անհրաժեշտ փոխել Ուկրաինայի՝ դաշինքին միանալու վերաբերյալ սահմանադրական կուրսը։ Այս մասին հայտնում են ուկրաինական լրատվամիջոցները։

Զելենսկու խոսքով՝ ամերիկյան սկեպտիցիզմը Ուկրաինայի՝ ՆԱՏՕ-ին միանալու հարցում սկսվել է ԱՄՆ-ի նախորդ վարչակազմի օրոք։

«Ես ուղղակիորեն հարցրեցի ԱՄՆ նախկին նախագահ Բայդենին՝ կարո՞ղ է Ուկրաինան միանալ ՆԱՏՕ-ին։ Դա դեռ պատերազմից առաջ էր։ Նախագահ Բայդենն ասաց՝ ոչ, դուք ՆԱՏՕ-ի անդամ չեք դառնալու։ Ես այդ հարցին բազմիցս եմ վերադարձել, ինչը երբեմն ժպիտ էր առաջացնում Սպիտակ տանը որոշ մարդկանց մոտ», – ասել է Զելենսկին։

Նա ընդգծել է, որ պետք է հստակ ասվի՝ ով է իրականում դեմ Ուկրաինայի անդամակցությանը։

«Ես չեմ հասկանում, երբ ասում են՝ «մենք սկզբունքորեն դեմ չենք, բայց դուք չեք դառնա ՆԱՏՕ-ի անդամ»։ Դա նշանակում է, որ ինչ-որ մեկը դեմ է։ Պետք է ազնվորեն ասել՝ ով է դեմ», – հայտարարել է Զելենսկին։

Բացի այդ, ըստ ուկրաինական լրատվամիջոցների, նա նշել է, որ հնարավոր է՝ ապագայում ԱՄՆ-ն փոխի իր դիրքորոշումը Ուկրաինայի՝ ՆԱՏՕ-ին միանալու հարցում։

«ԱՄՆ-ն հետևողական քաղաքականություն է վարում՝ ՆԱՏՕ-ում դեռևս մեզ չեն տեսնում։ Սակայն մեր կյանքում ամեն ինչ ‘դեռևս’ է։ Հնարավոր է, ապագայում դիրքորոշումը փոխվի։ Ով կհասկանա, որ Ուկրաինայի բանակը ուժեղացնում է ՆԱՏՕ-ն, ոչ թե հակառակը։ Սա քաղաքականության հարց է։ Աշխարհը փոխվում է՝ ոմանք ապրում են, ոմանք՝ մահանում», – ասել է Վլադիմիր Զելենսկին։