Կիևի քաղաքապետ Վիտալի Կլիչկոն ասել է, որ «հիմարություն» կլինի մտածել նախագահական հավակնությունների մասին այժմ, երբ լուծվում է Ուկրաինայի՝ որպես պետության գոյության հարցը։

«Այսօր այդ մասին մտածելը հիմարություն կլինի։ Այսօր հարցն այն է, թե Ուկրաինան գոյություն կունենա՞, թե՞ ոչ։ Պուտինը Ուկրաինան չի ընկալում որպես անկախ պետություն, դա գաղտնիք չէ։ Նա ասում է, որ Ուկրաինան պատկանում է Ռուսական կայսրությանը։ Մենք պայքարում ենք մեր ազատության և անկախության համար։ Ուստի հիմարություն կլինի խոսել իմ քաղաքական հավակնությունների մասին»,- ասել է Կլիչկոն շվեյցարական «20 Minuten» հրատարակությանը տված հարցազրույցում։

Լրագրողի այն հարցին, թե ի տարբերություն բանակի, զարմացած չէ՞ նախագահ Վլադիմիր Զելենսկու ժողովրդականության անկումից, Կլիչկոն պատասխանել է.

«Մարդիկ տեսնում են՝ ով է արդյունավետ, ով՝ ոչ։ Սպասելիքները շատ են եղել ու կան։ Զելենսկին վճարում է իր սխալների համար։ Մարդիկ իրենց հարց են տալիս, թե ինչու մենք ավելի լավ պատրաստված չէինք այս պատերազմին, ինչու Զելենսկին մինչև վերջին րոպեն հերքում էր, որ դա տեղի կունենա, կամ ինչու ռուսներին հաջողվեց այդքան արագ հասնել Կիև։ Չափազանց շատ տեղեկություն կար, որը ճիշտ չէր: Այնուամենայնիվ, նախագահն այսօր կարևոր դեր է խաղում, և մենք պետք է աջակցենք նրան մինչև պատերազմի ավարտը, բայց այս պատերազմի ավարտին բոլոր քաղաքական գործիչները կվճարեն իրենց հաջողության կամ ձախողման գինը»,- ասել է Կլիչկոն։

Ի պատասխան Ուկրաինայի Զինված ուժերի գլխավոր հրամանատար Վալերի Զալուժնիի հայտարարությանը, թե պատերազմը մտել է փակուղի, Կիևի քաղաքապետն ասել է, որ ինքը «ճշմարտությունն է ասել»։

«Երբեմն մարդիկ չեն ուզում լսել ճշմարտությունը, բայց ի վերջո նա է դրա պատասխանատուն։ Նա բացատրեց, թե ինչ իրավիճակ է այսօր։ Իհարկե, մենք կարող ենք խաբել մեր ժողովրդին և մեր գործընկերներին, բայց մենք չենք կարող դա անել։ Մեր որոշ քաղաքական գործիչներ քննադատել են Զալուժնիին, քանի որ նրա հստակ խոսքերն անարդար են։ Ես աջակցում եմ նրան»,- ասել է Կլիչկոն։