Կիևի քաղաքապետ Վիտալի Կլիչկոն անդրադառնում է Ուկրաինայի Զինված ուժերի ղեկավար Վալերի Զալուժնիի հնարավոր պաշտոնանկության հարցին և կոչ է անում վերջ տալ քաղաքական ինտրիգներին։ Այս մասին Կլիչկոն գրում է իր Telegram ալիքում։

«Մեծ մասամբ Վալերի Զալուժնիի շնորհիվ էր, որ ուկրաինացիները հավատացին մեր զինված ուժերին։ Գեներալ Զալուժնին շատ դժվար պահերի միջով է անցել։ Միայն նա գիտի, թե քանի նման պահեր են եղել… Բայց, ցավոք, հիմա այն պահն է, երբ քաղաքականությունը կարող է գերակշռել ողջախոհությանն ու պետության շահերին։ Եվ այս պահը կախված չէ Զալուժնիից։ Հուսով եմ՝ կառավարությունը գիտակցում է իր քայլերի լրջությունը և լիովին ընդունում է իր պատասխանատվությունը։ Որովհետև այսօր, երբ Ուկրաինան պայքարում է իր գոյության համար, գլխավորը մարտունակ, լավ կազմակերպված բանակն է և հասարակության միասնությունը։ Հասարակությունը այս հարցում վստահ չէ, և սա պետք է հաշվի առնել։ Վերջապես պետք է դադարեցնել քաղաքական ինտրիգներն ու ներքին կռիվները»,- գրել է Կլիչկոն։

Տեղեկության համար, ավելի վաղ Ուկրաինայի նախագահ Վլադիմիր Զելենսկին իտալական լրատվամիջոցներին տված հարցազրույցում նշել էր, որ դիտարկում է Ուկրաինայի զինված ուժերում կադրային փոփոխությունների հարցը։