Ներքին գործերի նախարար Վախտանգ Գոմելաուրին հանդիպում է ունեցել պաշտոնական այցով Վրաստանում գտնվող Գերմանիայի դաշնային կառավարության միգրացիոն հարցերով հատուկ ներկայացուցիչ Յոահիմ Շտամպի հետ։ Տեղեկությունը տարածում է ՆԳՆ-ն։

Հանդիպմանը մասնակցել են նաև Վրաստանի ներքին գործերի փոխնախարար Ալեքսանդրե Դարախվելիձեն, ԳԴՀ-ում Վրաստանի դեսպան Լևան Իզորիան, Վրաստանում ԳԴՀ փոխդեսպան Տանյա Հութը:

ՆԳՆ-ում կայացած հանդիպմանը կողմերը քննարկել են Եվրամիությունում և Շենգենյան գոտում Վրաստանի քաղաքացիների առանց վիզայի ռեժիմի հետ կապված հարցեր։ Հանդիպման մասնակիցներն ընդգծել են Եվրոպայի հետ ազատ տեղաշարժի քաղաքական և գործնական նշանակությունը Վրաստանի եվրաինտեգրման գործընթացում։

Վախտանգ Գոմելաուրին հյուրերին մանրամասն տեղեկատվություն է տրամադրել Վրաստանի ՆԳՆ կողմից իրականացվող միջոցառումների և իրականացվող բարեփոխումների մասին՝ առանց վիզայի ճանապարհորդությունը հաջողությամբ շարունակելու նպատակով։

Միգրացիոն հարցերով Գերմանիայի դաշնային կառավարության հատուկ ներկայացուցիչը դրական է գնահատել ռեադմիսիայի ոլորտում Վրաստանի ՆԳՆ-ի հաջող համագործակցությունը գերմանական կողմի հետ։

Հանդիպման շրջանակներում կողմերը քննարկել են նաև Գերմանիայի կողմից Վրաստանը որպես անվտանգ ծագման երկիր ճանաչելու հարցը։ Կողմերի միջև նաև պայմանավորվածություն է ձեռք բերվել, որ երկու երկրների նախարարությունների միջև ինտենսիվ համագործակցությունը շարունակվելու է տարբեր ուղղություններով։

Տեղեկությունը տարածում է ՆԳՆ-ն։