Վրաստանի ներքին գործերի նախարար Վախտանգ Գոմելաուրին լրատվամիջոցներին մեկնաբանել է Սագարեջոյում տեղի ունեցած միջադեպը։

Նրա խոսքով, հինգ մարդ մահացել է, իսկ վիրավորներից մեկի վիճակը ծանր է։

«Սա շատ լուրջ դեպք է։ Ցավակցում եմ ընտանիքներին։ Հինգ մարդ է մահացել է: Ցավոք, այդ թվում՝ մեր աշխատակիցներից մեկը։ Հինգը վիրավոր են, նրանցից մեկը ծանր վիրավոր է և վիրահատվում է, իսկ ծանրության աստիճանը բժիշկները դեռ չեն կարող ասել։ Նրա զարկերակը վնասված է, և մեզ հստակ չեն կարող ասել՝ նա ողջ կմնա, թե ոչ։ Տա Աստված, փրկվի»,- ասել է Վախտանգ Գոմելաուրին։

Նրա խոսքով, ոչ ոք չի կարող բացատրել, թե ինչ է տեղի ունեցել:

«Քաղաքացին տնից սկսել է ավտոմատից կրակել: Նրա որդին՝ չափահաս տղան, տանն էր։ Կրակոցները սկսել է պատշգամբի մի կողմից, հետո՝ մյուս կողմից։ Այս երեխան հետո դուրս է եկել տանից։ Հետո եկան ոստիկանության աշխատակիցները, մյուս կողմից կրակ բացեց ու վիրավորվեց մեր աշխատակիցը։ Նա մահացավ հիվանդանոց տեղափոխվելիս։ Դեռևս գիտենք այսքանը»,- ասաց Վախտանգ Գոմելաուրին։

Նրա խոսքով, հարձակման մեջ մեղադրվողը մինչև 2021 թվականը ծառայել է Վրաստանի զինված ուժերում։

«Օպերատիվ կերպով, ինչ մեզ հաստատեցին, նա աշխատում էր 2006 թվականից, դուրս է եկել 2021 թվականին։ Դա առաջնային տեղեկատվություն է, և ես չեմ կարող ձեզ մանրամասն ասել։ Ինչպես մեզ ասացին, 2021 թվականին թողել է զինվորական ծառայությունն ու հեռացել։ Նա եղել է նաև Աֆղանստանում, առաքելությամբ, ինչպես մեզ հաստատեցին, և դեռ ոչ ոք հստակ չգիտի»,- ասել է Վախտանգ Գոմելաուրին։

Նրա խոսքով, հատուկ ջոկատայինները մեղադրյալին մահացած են հայտնաբերել։

«Հատուկ ջոկատը եկավ, սկսվեց միջոցառումը, նրան կոչ արեցին, իհարկե, նույն կրակոցը արձակեց։ Երբ հատուկջոկատայինները բացել են դուռը, կրակոցների ձայներ են լսվել։ Երբ ներս են մտել, նա պառկած է եղել անկողնու վրա՝ կողքին դրված հրազենով, գլխից արյունահոսելիս։ Նռնակի օղակներ են եղել՝ մի քանի հատ։ Կարող էր ականապատված լինել, կանչեցինք սակրավորներին։ Նրանք արդեն ավարտեցին»,- ասաց Վախտանգ Գոմելաուրին։

Նախարարի խոսքով, մեղադրյալի որդին դեպքի մասին ոչինչ ասել չի կարող։

«Որդին մեզ ոչինչ չի ասում։ Ասում է, երբ դուրս եկա, դիակներ էին, փախա, նա մեզ ոչինչ չասաց»,- հավելեց Վախտանգ Գոմելաուրին։

Սագարեջոյում անհայտ անձը ուշ գիշերին կրակ է բացել շենքերից մեկից։

Ըստ վերջին տեղեկությունների՝ կրակոցների հետեւանքով հինգ մարդ է զոհվել, հինգը՝ վիրավորվել։ Ըստ ՆԳՆ-ի՝ դեպքի վայր ժամանելուն պես մեղադրյալը ինքնասպանություն է գործել։