Վարկանիշային S&P Global Ratings գործակալությունը Վրաստանի ինքնիշխան վարկանիշն անփոփոխ՝ BB մակարդակում է թողել, իսկ հեռանկարը «կայունից» բարելավել է «դրականի»

S&P Global Ratings վարկանիշային գործակալությունը գնահատել է Վրաստանի ինքնիշխան վարկանիշը և, հաշվի առնելով տարբեր գործոններ, այն թողել է անփոփոխ՝ BB մակարդակում, սակայն կարևոր է, որ հեռանկարը «կայունից» բարելավել է «դրականի»: Այս մասին տեղեկատվություն է տարածում Ֆինանսների նախարարությունը։

Գերատեսչության տեղեկացմամբ՝ գործակալությունը Վրաստանի տնտեսական, ֆիսկալ և դրամավարկային քաղաքականության շրջանակը կրկին գնահատում է ողջամիտ ու հեռատես և նշում, որ երկիրը, չնայած աշխարհաքաղաքական մարտահրավերներին, շարունակում է պահպանել գլոբալ առումով ամենաբարձր տնտեսական աճի ցուցանիշներից մեկը։

«Երկրի գնահատման փաստաթղթում նշված է, որ Վրաստանը պահպանում է կայուն տնտեսական աճը, հեռատես մակրոտնտեսական քաղաքականությունն ու ուժեղ Ներքին պահանջարկը։ Վարկանիշը պայմանավորված է միջազգային պահուստների աճով, տնտեսական աճի բարձր ցուցանիշներով, իրականացված ֆիսկալ քաղաքականությամբ, կառավարության չափավոր պարտքով և կայուն բանկային համակարգով, ինչին ավելանում է միջազգային ֆինանսական հաստատություններից արտոնյալ ֆինանսավորման հասանելիությունը։

Հաշվետվության համաձայն՝ դրական հեռանկարի շնորհման հիմքերն են ներկայացնում գործակալության սպասումները, որ Վրաստանը կշարունակի արտաքին դիրքի հետագա բարելավումը միջազգային պահուստների կուտակմամբ, ինչը նվազեցնում է խոցելիությունը արտաքին ցնցումների նկատմամբ։ Դրական հեռանկարը նաև արտացոլում է սպասումները, որ Վրաստանի տնտեսական աճի ուժեղ ցուցանիշներն ու հեռատես ֆիսկալ քաղաքականությունը կպահպանվեն և առաջիկա 12 ամսվա ընթացքում էլ ավելի կբարելավեն ֆիսկալ դիրքերը։

Վարկանիշային ընկերությունը նշում է, որ, չնայած աշխարհաքաղաքական մարտահրավերներին, երկիրը ցույց է տալիս ուժեղ տնտեսական արդյունքներ։ S&P-ն ակնկալում է, որ երկիրը կշարունակի արդյունավետ ֆիսկալ քաղաքականություն վարել, ինչով կապահովվի բյուջեի դեֆիցիտի և կառավարության պարտքի պահպանումը չափավոր մակարդակում։ Նշված է ընթացիկ հաշվի դեֆիցիտի զգալի նվազումը և այդ միտման պահպանումը, ինչպես նաև խիստ դրամավարկային քաղաքականությունը՝ հաշվի առնելով գնաճային միտումները։ Գործակալության կանխատեսմամբ՝ փետրվարի համեմատությամբ, բազային սցենարում տնտեսական աճի կանխատեսվող ցուցանիշները զգալիորեն աճել են, համապատասխանաբար՝ 2026 թվականին՝ մինչև 6․4 տոկոս, 2027 թվականի համար՝ մինչև 5․9 տոկոս, իսկ միջնաժամկետ կանխատեսման մեջ պահպանվում են 5%-ի սահմաններում։ S&P-ն Վրաստանի բանկային համակարգը գնահատում է որպես լավ կապիտալացված և բարձր իրացվելի, ինչպես նաև ընդգծված են Ազգային բանկի կողմից իրականացված մակրոպրուդենցիալ միջոցառումները», — նշված է Ֆինանսների նախարարության տարածած տեղեկատվության մեջ։