Ուկրաինային և Մոլդովային թեկնածուի կարգավիճակ տրամադրելու և Վրաստանի եվրոպական հեռանկարի ճանաչման վերաբերյալ Եվրամիության խորհրդի համաձայնագիրը ուժեղ քաղաքական աջակցության նշան է,- ասել է Եվրախորհրդարանի պատգամավոր Տոնինո Պիցուլան, ով զեկուցող է ԵՄ ընդլայնման նոր ռազմավարությունը հարցով։

Ինչպես իր խոսքում նշել է Տոնինո Պիցուլան, յուրաքանչյուր երկրի պետք է գնահատել իր արժանիքներով։

«Եվրամիության խորհրդի համաձայնագիրը Ուկրաինային ու Մոլդովային թեկնածուի կարգավիճակ տալու և Վրաստանի եվրոպական հեռանկարի ճանաչման մասին ուժեղ քաղաքական աջակցության նշան է։ Այս որոշմամբ ԵՄ ընդլայնման քաղաքականությունը պաշտոնապես տարածվեց նաեւ Արեւելյան գործընկերության երկրների վրա։ Ուստի մեր ներքին վարչական կառույցները և արտաքին ֆինանսական գործիքները պետք է համապատասխանաբար ճշգրտվեն: Յուրաքանչյուր երկրի պետք է գնահատել իր արժանիքներով: ԵՄ-ն պետք է հաղթահարի ընդլայնման փակուղին։ Իսկ դրա համար անհրաժեշտ է ԵՄ ընդլայնման նոր ռազմավարություն, որում հստակ կսահմանվեն քաղաքական խնդիրները, կիրականացվեն անհրաժեշտ և ժամանակին ինստիտուցիոնալ բարեփոխումներ։ Օրենքի գերակայությունը պետք է առանցքային լինի գործընթացում: Մենք պետք է ռազմավարական առումով օգտագործենք նպատակային, պայմանի վրա հիմնված, հստակ չափորոշիչներ: Սա նշանակում է բարեփոխումների ժամանակին խրախուսում, ժամանակին արձագանքում հետընթացին և առաջընթացի մշտական ​​դեֆիցիտին։ Նույն համատեքստում պետք է ընդգծել անդամակցության գործընթացում ներգրավված երկրների համապատասխանեցումը Եվրամիության արտաքին և անվտանգության քաղաքականությանը։ ԵՄ անդամակցությունը նշանակում է ավելին, քան պարզապես ԵՄ ֆինանսական հիմնադրամներն ու տրանսպորտային միջանցքները: Ամենակարևորն այն է, որ այն ներկայացնում է արժեքների և սկզբունքների մի շարք, որոնք պետք է կիսվեն և հարգվեն»,- ասաց բանախոսը։

Եվրախորհրդարանում այսօր կայացած նիստում քննարկվել է Եվրամիության ընդլայնման նոր ռազմավարությունը։