Փոխվարչապետ, էկոնոմիկայի և կայուն զարգացման նախարար Լևան Դավիթաշվիլին, ֆինանսների նախարար Լաշա Խուցիշվիլին և բնապահպանության և գյուղատնտեսության նախարար Օթար Շամուգիան աշխատանքային հանդիպում են ունեցել առաջնային սննդամթերքի բաշխման ընկերությունների և ցանցային խանութների ղեկավարների հետ։

Հանդիպումը տեղի է ունեցել էկոնոմիկայի և կայուն զարգացման նախարարությունում, որին մասնակցել են նաև էկոնոմիկայի և կայուն զարգացման փոխնախարարներ Գենադի Արվելաձեն և Իրակլի Նադարեիշվիլին, Եկամուտների ծառայության ղեկավար Լևան Կակավան և Ազգային մրցակցության գործակալության նախագահ Իրակլի Լեքվինաձեն։

Հանդիպմանը քննարկվել է Վրաստանի սննդամթերքի սպառողական շուկայում տիրող իրավիճակը։ Նշվել է, որ չնայած լարիի փոխարժեքի ամրապնդմանը և ներմուծվող առաջնային պահանջարկի սննդամթերքի գների նվազմանը, դրանց արժեքը խանութներում գրեթե անփոփոխ է, ինչը հատկապես բացասաբար է անդրադառնում բնակչության սոցիալապես առավել խոցելի խմբերի վրա։ Այդ թվում շեշտադրվել է այն հանգամանքը, որ գնաճի մեջ ամենամեծ ներդրումը գալիս է պարենային ապրանքներից։

Վրաստանի վարչապետի հանձնարարությամբ կառավարության տնտեսական թիմին հանձնարարվել է ստեղծել աշխատանքային խումբ, որը կաշխատի ինչպես դիստրիբյուտորների, այնպես էլ ցանցային խանութների ղեկավարների հետ՝ ողջամիտ ժամկետում իրավիճակի լուծում գտնելու համար։

Հանդիպմանն ասվել է, որ սպառողը պետք է ձեռք բերի առաջնային նշանակության պարենային ապրանքներ մատչելի գնով, մրցակցային պայմաններում։

Նշվել է նաև, որ էկոնոմիկայի և կայուն զարգացման նախարարությունը կպատրաստի մանրածախ առևտրի մասին օրենքի նախագիծ, որը կարտացոլի համապատասխան եվրոպական դիրեկտիվի պահանջները։ Բիզնեսը ակտիվորեն ներգրավվելու է օրենքի նախագծի վերանայման գործընթացում։

Հանդիպումն անցավ քննարկման ռեժիմով։

Տեղեկությունը տարածում է էկոնոմիկայի նախարարության մամուլի ծառայությունը։