Վրաստանի խորհրդարանական պատվիրակության`Թուրքիա կատարած պաշտոնական այցի շրջանակներում տեղի ունեցավ վրաց-թուրք-ադրբեջանական խորհրդարանների արտաքին հարաբերությունների կոմիտեների վեցերորդ ամենամյա նիստը:

Հանդիպմանը պատվիրակության ղեկավար Նիկոլոզ Սամխարաձեն դիմեց պատվիրակության անդամներին և անդրադարձավ տարածաշրջանում ընթացող գործընթացներին, անվտանգության մարտահրավերներին և դրանց լուծման գործընթացում երեք երկրների դերին: Այս առումով նա հատուկ ուշադրություն է դարձրել Վրաստանի օկուպացված տարածքներում տիրող իրավիճակին, Ռուսաստանի ապակառուցողական գործողություններին, Սև ծովի անվտանգությանը և ՆԱՏՕ-ին Վրաստանի անդամակցության կարևորությանը` որպես տարածաշրջանային անվտանգության և կայունության ամրապնդման միակ միջոց:

Հանդիպմանը քննարկվել են նաև տարածաշրջանային համագործակցության հարցեր, ինչպիսիք են առևտուրը, էներգետիկան և ենթակառուցվածքները, մշակույթը, պաշտպանությունը, անվտանգությունը, շրջակա միջավայրը և մարդկանց միջև շփումները: Ընդգծվել է օրենսդիր մարմինների համագործակցության կարեւորությունը եւ խորհրդարանական կապերի խորացման հնարավորությունները: Այս համատեքստում կողմերը քննարկել են նաև նոր մեխանիզմների և ձևաչափերի ստեղծման հարցը:

Կողմերը վերահաստատեցին իրենց վճռական աջակցությունը Վրաստանի ինքնիշխանությանը և տարածքային ամբողջականությանը և պատրաստակամություն հայտնեցին հետագա քայլեր ձեռնարկել Սև ծովի և Հարավային Կովկասի տարածաշրջանում խաղաղության, կայունության և անվտանգության խթանման համար:

Տեղեկությունը տարածում է Վրաստանի խորհրդարանի մամուլի ծառայությունը: