Թուրքիայի արդարադատության նախարարությունը դիմել է երկրի ներքին գործերի նախարարությանը՝ Բենիամին Նեթանյահուի նկատմամբ Ինտերպոլով «կարմիր ծանուցում» արձակելու և նրան կալանավորելու նպատակով

Թուրքիայի արդարադատության նախարարությունը դիմել է երկրի ներքին գործերի նախարարությանը՝ Իսրայելի վարչապետ Բենիամին Նեթանյահուի նկատմամբ միջազգային ձերբակալության նպատակով «կարմիր ծանուցում» արձակելու խնդրանքով: Այս մասին հայտարարել է Թուրքիայի արդարադատության նախարար Աքին Գյուրլեքը:

Թուրք նախարարի խոսքով՝ միջազգային ջրերում «Գլոբալ ֆլոտիլիայի» ակտիվիստների վրա հարձակման վերաբերյալ դատական գործընթացը, որոնք հումանիտար օգնություն էին տանում Գազա, վճռականորեն շարունակվում է:

«Բենիամին Նեթանյահուն և Աֆեք Մոսկովիչը մեղադրվում են «մարդկության դեմ ուղղված հանցագործությունների», «ցեղասպանության», «ծանրացուցիչ հանգամանքներում ազատությունից ապօրինի զրկելու», «դիտավորությամբ մարմնական վնասվածք հասցնելու», «խոշտանգումների», «գույքը վնասելու», «ծանրացուցիչ հանգամանքներում կողոպուտի» և «տրանսպորտային միջոցներ փախցնելու» մեջ: Սա կապված է նրանց գործողությունների հետ, որոնք վերաբերում են միջազգային ջրերում Գազային հումանիտար օգնություն մատակարարող խաղաղ բնակչության դեմ զինված միջամտությանը և ակտիվիստների ձերբակալությանը: Մենք բացարձակապես համամիտ չենք այն ընկալման հետ, թե Նեթանյահուի վարչակազմը, որը Գազայում ցեղասպանության քաղաքականություն է իրականացնում, անձեռնմխելի է», – նշել է Թուրքիայի արդարադատության նախարարը:

Գյուրլեքը հայտարարել է, որ այս համատեքստում Ստամբուլի 11-րդ ծանր հանցագործությունների դատարանը 35 մեղադրյալի, այդ թվում՝ Իսրայելի վարչապետ Բենիամին Նեթանյահուի և Աֆեք Մոսկովիչի դեմ քրեական հետապնդում է իրականացնում 2026/108 համարի գործի շրջանակներում: