Այն թոշակառու ուսուցիչները, որոնք ինքնակամ հեռանում են համակարգից, դրամական պարգև կկարողանան ստանալ մինչև տարեվերջ,- այս մասին հայտարարել է Վրաստանի կրթության նախարար Միխեիլ Բատիաշվիլին՝ կառավարության նիստի ավարտից հետո անցկացված մամլո ասուլիսին:

Ինչպես նշել է Միխեիլ Բատիաշվիլին, ուսուցչի մասնագիտական զարգացման սխեմայում արդեն մտցվել են փոփոխություններ:

«Որոշումը արդեն մտել է ուժի մեջ: Երկու տարվա աշխատավարձի հետ միասին, համակարգից ինքնակամ հեռանալու դեպքում թոշակառու մանկավարժները կստանան նաև առողջության ապահովագրում: Մոտ 6 հազար մանկավարժ է, որ ցանկություն է հայտնել դուրս գալ համակարգից»,- հայտարարել է Միխեիլ Բատիաշվիլին:

Նախարարի հայտարարությամբ, մանկավարժների մի մասը ևս ցանկանում է հեռանալ և ցանկացողների քանակը ցույց է տալիս, որ թեման հրատապ էր:

«Համարում ենք, որ պետությունը պետք է հոգ տանի այն մարդկանց մասին, որոնք տարիներ շարունակ ծառայել են այս համակարգին»,- հայտարարել է Բատիաշվիլին:

Կրթության բարեփոխման շրջանակներում թոշակային տարիքի պրակտիկանտ ուսուցիչների համար հաստատվել է դրամական պարգև տալու կարգը: