Աջարիայի կառավարությունում անցկացվել է ընթացիկ տարվա առաջին նիստը։ Թոռնիկե Ռիժվաձեն խոսել է այն նախագծերի մասին, որոնք նախատեսվում է ավարտել այս տարի։

«2022 թվականին կավարտվի սոցիալական ամենամեծ նախագիծը՝ «Երազանքի» քաղաքի առաջին փուլը, որտեղ բնակարան կստանա 582 ընտանիք։ Շինարարության երկրորդ փուլի համար անհրաժեշտ ընթացակարգերն արդեն ընթացքի մեջ են։

Քեդայում ավարտվել է սոցիալական տան շինարարությունը, և մի քանի օրից 20 ընտանիք կշարունակի ապրել անվտանգ միջավայրում։

Քոբուլեթիում կգործարկվի կոշտ թափոնների կառավարման կայանը, կսկսվեն Բաթումի աղբավայրը փակելու համար անհրաժեշտ ընթացակարգերը»,- ասել է Թոռնիկե Ռիժվաձեն։

Նրա խոսքով, այս տարի Աջարիայի գյուղերի և ավանների ջրային համակարգի զարգացման համար կծախսվի 22 մլն եվրո, իսկ այս տարի կավարտվի Գոդերձի հանգստավայրի ջրամատակարարման և կոյուղու համակարգերի կազմակերպումը։

«Նաև այս տարի Բաթումին կունենա նոր մարզահամալիր, կավարտվի Չաքվի ծանրամարտի բազայի և Շուախևի մարզադաշտի վերակառուցումը։ Ռեգբիի բազաներ, մարզադահլիճներ և համալիրներ կկառուցվեն նաև Քոբուլեթիում, Բաթումում, Ղորջոմիում, Չաքվիում, Խուցուբանիում և Ֆուրտիոյում», – ասել է Թոռնիկե Ռիժվաձեն։

Վարչապետի խոսքով՝ 2022 թվականին զբոսաշրջության ենթակառուցվածքների և ծառայությունների զարգացումը առաջնահերթություն է։ Նրա խոսքով, Աջարիայի բոլոր մունիցիպալիտետներում լայնածավալ ծրագրեր են իրականացվում։

Թոռնիկե Ռիժվաձեն ամփոփել է նաեւ ցիտրուսների անցած սեզոնը: Նրա խոսքով, Աջարիայից արտահանվել է 38 հազար տոննա ցիտրուս։ Ընթացիկ սեզոնին գործել են ցիտրուսային մշակաբույսերի վերամշակման մինչև 30 ձեռնարկություններ։