Վրաստանի Առաջին ալիքի գլխավոր տնօրեն Թինաթին Բերձենիշվիլին հանդիպել է Հանրային հեռարձակողի ստաժավորման ծրագրի մասնակիցների հետ։ Վրաստանի Առաջին ալիքը մշտապես հայտարարում է ստաժավորման ծրագրեր, որոնց տեւողությունը, կախված առանձին ուղղությունների առաջադրանքներից, միջինը երեքից վեց ամիս է։

Առաջին ալիքի նպատակն է բացել ինտելեկտուալ ռեսուրսները սկսնակների համար և նրանց գիտելիքներ տալ մեդիա ոլորտում։ Ներկայումս Հանրային հեռարձակողում պրակտիկա է անցնում 35 երիտասարդ, որոնք բաշխված են տարբեր ուղղություններով՝ սոցիալական մեդիայի մենեջերներ, թղթակիցներ, օպերատորներ, պրոդյուսերների օգնականներ, խմբագիրներ։

Մի քանի բուհերի հետ ստորագրված հուշագրի շրջանակներում Առաջին ալիքն ակտիվորեն համագործակցում է ինչպես ուսանողներին պրակտիկա առաջարկելու, այնպես էլ նրանց կրթական գործունեությանը ներգրավելու առումով։ 2021-2022 թվականներին 100 աշակերտ տարբեր դպրոցներից մասնակցել է Առաջին ալիքի կողմից կազմակերպված վերապատրաստման դասընթացներին և գիտաժողովներին։

«Անցյալ տարի մենք սկսել ենք ակտիվ պրակտիկայի ծրագիր, սակայն նախկինում չէինք կարող դա անել՝ համաճարակի պատճառով։ Մենք ստեղծել ենք բոլորովին նոր շրջանակ, լավ սահմանված չափանիշներ պրակտիկայի ծրագրի համար: Ամենակարևորը, մենք շատ մարդիկ ունեցանք: Մեր կազմակերպությունում պրակտիկա է անցել 120 երիտասարդ, ինչը շատ է մեկ տարվա համար։ Ինձ ամենաշատը գոհացնում է այն, որ նրանցից 30-ն այսօր մեր աշխատակիցներն են։ Նման վիճակագրություն մենք նախկինում չենք ունեցել։ Բացի այդ, ինչ կրթական ռեսուրս ունենք, մենք կիսում ենք նոր սերնդի հետ։ Կարևոր է, որ նոր սերունդը հանրային հեռարձակող մտնելու և աշխատանքի անցնելու մեծ ցանկություն ունի։ Նաև շատ կարևոր է տաղանդավոր մարդկանց ներգրավել Հանրային հեռարձակող»,- ասել է Վրաստանի Առաջին ալիքի գլխավոր տնօրեն Թինաթին Բերձենիշվիլին։

2021-2022 թվականներին Առաջին ալիքի ստաժավորման ծրագրին մասնակցել է շուրջ 150 դիմորդ։ Ծրագիրը նախատեսում է նաև թափուր պաշտոնների համար հաջողակ պրակտիկանտների աշխատանքի դիտարկման հնարավորություն, հաջող պրակտիկա անցնելուց հետո կազմակերպությունում տարեսկզբին աշխատանքի է ընդունվել 30 պրակտիկանտ։