The Wall Street Journal – Սպիտակ տունը ուկրաինական կողմին է փոխանցել Թրամփի հրադադարի առաջարկները, այդ թվում՝ Ղրիմի բռնակցման ճանաչումը և Ուկրաինային ՆԱՏՕ-ին անդամակցելու մերժումը
Wall Street Journal-ի հաղորդմամբ՝ Սպիտակ տունը ուկրաինական կողմին է փոխանցել Թրամփի հրադադարի առաջարկները։ Դրանց թվում են Ղրիմի անեքսիայի ճանաչումը և Ուկրաինայի ՆԱՏՕ-ին անդամակցության մերժումը։
Ինչպես գրում է Wall Street Journal-ը՝ հղում անելով արևմտյան բարձրաստիճան պաշտոնյաներին, այս գաղափարները ներկայացված են գաղտնի փաստաթղթում, որը Թրամփի ներկայացուցիչները անցյալ շաբաթ Փարիզում փոխանցել են իրենց ուկրաինացի գործընկերներին։ Նմանատիպ առաջարկներ են ներկայացվել նաև ԱՄՆ-ի եվրոպացի դաշնակիցներին։
Ավելի վաղ Bloomberg-ը հայտնել էր, որ ԱՄՆ-ն քննարկում է Ղրիմի Ռուսաստանի կողմից բռնակցման ճանաչման հարցը։
Բացի այդ, մեկ այլ գաղափար է Զապորոժիեի ատոմակայանի շրջակայքը հայտարարել չեզոք և այն դնել ԱՄՆ վերահսկողության տակ։ Ատոմակայանը ներկայումս օկուպացված է Ռուսաստանի կողմից։
Ինչպես հաղորդում է Wall Street Journal-ը, ԱՄՆ-ն այժմ սպասում է Կիևի պատասխանին այս առաջարկներին։ Կիևի պատասխանը, ինչպես սպասվում է, կհայտարարվի այս շաբաթվա վերջին, երբ Լոնդոնում կհավաքվեն ԱՄՆ-ի, Ուկրաինայի և Եվրոպայի ներկայացուցիչները։ Եթե Ամերիկայի, Եվրոպայի և Ուկրաինայի դիրքորոշումները համընկնեն Լոնդոնում, ապա այդ առաջարկները կփոխանցվեն Մոսկվային։
Սակայն, ինչպես նշում է ԱՄՆ Պետդեպարտամենտի բարձրաստիճան պաշտոնյան, այս գաղափարները Կիևի համար քննարկման ենթակա տարբերակներ են, այլ ոչ թե վերջնական առաջարկներ։
«Wall Street Journal»-ը նաև նշում է, որ ԱՄՆ-ի կողմից ներկայացված առաջարկները չեն համապատասխանում ո՛չ Ուկրաինայի, ո՛չ էլ Ռուսաստանի պահանջներին։ Ուկրաինան չի քննարկում Ղրիմի անեքսիան ճանաչելու հարցը, մինչդեռ Ռուսաստանը կարծում է, որ Ուկրաինայի չորս այլ շրջաններ պատկանում են իրեն։ Այս առաջարկները չեն ներառում նաև Ռուսաստանի մեկ այլ պահանջ, որը ներառում է ուկրաինական բանակի կրճատումը, Ուկրաինային Արևմուտքի ռազմական աջակցությունից հրաժարվելը և եվրոպական ռազմական ուժերի տեղակայումը Ուկրաինայում։